ന്യൂഡൽഹി: രാജ്യത്ത് മലിനീകരണം ഉണ്ടാക്കുന്ന വാഹനങ്ങൾ ഘട്ടംഘട്ടമായി നിർത്തലാക്കാനും അവയുടെ ഉപയോഗം കുറക്കാനുമായി, 20 വർഷത്തിലധികം പഴക്കമുള്ള വാഹനങ്ങളുടെ റീ-രജിസ്‌ട്രേഷൻ ഫീസ് കേന്ദ്രസർക്കാർ കുത്തനെ വർദ്ധിപ്പിച്ചു. കേന്ദ്ര റോഡ് ഗതാഗത, ഹൈവേ മന്ത്രാലയം പുറത്തിറക്കിയ വിജ്ഞാപനത്തിലാണ് ഇത് സംബന്ധിച്ച ഉത്തരവുള്ളത്.
പുതിയ നിരക്കുകൾ:
- ഇരുചക്ര വാഹനങ്ങൾ: 1,000 രൂപയിൽ നിന്ന് 2,000 രൂപയായി ഉയർത്തി.
- മുച്ചക്ര വാഹനങ്ങൾ: 3,500 രൂപയിൽ നിന്ന് 5,000 രൂപയായി ഉയർത്തി.
- ലൈറ്റ് മോട്ടോർ വാഹനങ്ങൾ: 5,000 രൂപയിൽ നിന്ന് 10,000 രൂപയായി ഉയർത്തി.
ഇറക്കുമതി ചെയ്യുന്ന വാഹനങ്ങൾക്കും നിരക്ക് വർധന ബാധകമാണ്.
- ഇറക്കുമതി ചെയ്ത ഇരുചക്ര, മുച്ചക്ര വാഹനങ്ങൾ: 10,000 രൂപയിൽ നിന്ന് 20,000 രൂപയായി ഉയർത്തി.
- ഇറക്കുമതി ചെയ്ത കാറുകൾ: 40,000 രൂപയിൽ നിന്ന് 80,000 രൂപയായി ഉയർത്തി.
ഈ വർഷം ഫെബ്രുവരിയിൽ പുതിയ രജിസ്‌ട്രേഷൻ നയവുമായി ബന്ധപ്പെട്ട് ഒരു കരട് നിർദേശം കേന്ദ്ര റോഡ് ഗതാഗത, ഹൈവേ മന്ത്രാലയം പുറത്തിറക്കിയിരുന്നു. നേരത്തെ, ഡൽഹിയിലും പരിസരപ്രദേശങ്ങളിലും 15 വർഷം പഴക്കമുള്ള പെട്രോൾ വാഹനങ്ങൾക്കും 10 വർഷം പഴക്കമുള്ള ഡീസൽ വാഹനങ്ങൾക്കും സർക്കാർ കർശന വിലക്കേർപ്പെടുത്തിയിരുന്നു. ഇതിന് സുപ്രീം കോടതി സ്റ്റേ നൽകിയതിനു പിന്നാലെയാണ് കേന്ദ്രസർക്കാരിന്റെ ഈ നടപടി. രാജ്യത്തുടനീളം ഓട്ടോമേറ്റഡ് ഫിറ്റ്നസ് ടെസ്റ്റ് സ്റ്റേഷനുകളുടെ എണ്ണം വർദ്ധിപ്പിച്ചതിനാൽ, ഈ പുതിയ ഉത്തരവ് ഉടൻ പ്രാബല്യത്തിൽ വരുമെന്ന് അധികൃതർ അറിയിച്ചു.
Central government drastically hikes registration fees for old vehicles to curb pollution
