ദേശീയ പൗരത്വ രജിസ്റ്ററുമായി (എൻ.ആർ.സി) ബന്ധപ്പെട്ട ഭീതിയിൽ കൊൽക്കത്തയിൽ ഒരു വയോധികൻ ജീവനൊടുക്കി. ബംഗ്ലാദേശിലേക്ക് നാടുകടത്തപ്പെടുമെന്ന ആശങ്കയിൽ 70-വയസ്സുകാരനായ ദിലീപ് കുമാർ സാഹയാണ് ആത്മഹത്യ ചെയ്തു. എൻആർസി നടപ്പിലായാൽ തിരിച്ചയക്കുമെന്ന കടുത്ത മാനസിക സമ്മർദത്തിലായിരുന്നു ദിലീപ് എന്ന് ഭാര്യ ആരതി സാഹ വെളിപ്പെടുത്തുന്നു.
ഇന്നലെ രാവിലെ പതിവുപോലെ ഉണർന്നില്ലെന്നതിൽ സംശയം തോന്നിയ ഭാര്യയുടെ നിരന്തരമായ വിളികൾക്കൊന്നും പ്രതികരിച്ചില്ല. തുടര്‍ന്ന് അയല്‍വാസികളുടെ സഹായത്തോടെ വാതില്‍ തുറക്കുകയും ഫാനിൽ തൂങ്ങി നിൽക്കുന്ന നിലയിലാണ് ദിലീപിനെ കണ്ടെത്തിയത്. മരണത്തില്‍ ദുരൂഹതയില്ലെന്നും ആത്മഹത്യാകുറിപ്പ് കണ്ടെത്തിയതായും പൊലീസ് വ്യക്തമാക്കി.
1972-ല്‍ ബംഗ്ലാദേശിലെ ധാക്കയിലെ നവാബ്ഗഞ്ചില്‍ നിന്നും കൊല്‍ക്കത്തയിലേക്കാണ് ദിലീപ് എത്തിയത്. ധക്കുരിയയിലുള്ള സ്വകാര്യ സ്‌കൂളില്‍ അധ്യാപകനായി ജോലി ചെയ്തുവരികയായിരുന്നു. വോട്ടര്‍ ഐഡിയും മറ്റു നിയമപരമായ രേഖകളും കൈവശം ഉണ്ടായിരുന്നുവെന്ന് കുടുംബം വ്യക്തമാക്കിയിട്ടുണ്ട്. എന്നാല്‍ പൗരത്വ സംശയത്തിലൂടെ തിരിച്ചയക്കപ്പെടുമെന്ന ഭയം ദിലീപിനെ തളർത്തിയതായി പറയുന്നു.
സംഭവത്തെ തുടര്‍ന്ന് പ്രാദേശിക എം.എൽ.എയും സംസ്ഥാന വൈദ്യുതി മന്ത്രിയുമായ അരൂപ് ബിശ്വാസ് കുടുംബത്തെ സന്ദര്‍ശിക്കുകയും മരണം സംബന്ധിച്ച റിപ്പോര്‍ട്ടുകളില്‍ പ്രതിപാദിച്ച ആശങ്കകള്‍ പങ്കുവെക്കുകയും ചെയ്തു. ആത്മഹത്യയ്ക്കു പിന്നിൽ എൻആർസിയുമായി ബന്ധപ്പെട്ട മാനസിക സമ്മർദ്ദമാണോ എന്നതിനെക്കുറിച്ച് പൊലീസ് അന്വേഷണത്തിലാണെന്നും ഔദ്യോഗിക സ്ഥിരീകരണമില്ലെന്നും അധികൃതർ അറിയിച്ചു.
Fear of Deportation Ends in Tragedy; Elderly Man Dies by Suicide in Kolkata
