ദില്ലി : റഷ്യയിൽ നിന്ന് ക്രൂഡ് ഓയിൽ ഇറക്കുമതി ചെയ്യുന്നതിന് ഇന്ത്യക്കെതിരെ 25 ശതമാനം അധിക പിഴ താരിഫ് ചുമത്താനുള്ള യുഎസ് തീരുമാനത്തിനെതിരെ ഇന്ത്യ. നീതികരിക്കാനാവാത്തതും, യുക്തിരഹിതവുമായ നടപടിയെന്ന് വിദേശകാര്യ മന്ത്രാലയം പ്രസ്താവന പുറത്തിറക്കി. രാജ്യതാൽപര്യങ്ങൾ സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കുമെന്നും ഇന്ത്യ വ്യക്തമാക്കി. ഇതുസംബന്ധിച്ച ഉത്തരവിൽ ട്രംപ് ഒപ്പുവെച്ചതായി വൈറ്റ് ഹൗസ് വൃത്തങ്ങൾ അറിയിച്ചതിന് പിന്നാലെയാണ് ഇന്ത്യയുടെ പ്രതികരണം. ഇന്ത്യക്ക് മേലുള്ള അമേരിക്കൻ താരിഫ് ഇതോടെ 50 ശതമാനമായി ഉയരും.
പ്രധാന പ്രതികരണങ്ങൾ
വിദേശകാര്യ മന്ത്രാലയത്തിന്റെ പ്രസ്താവന: യുഎസ് നടപടിക്ക് പിന്നാലെ വിദേശകാര്യ മന്ത്രാലയം ഔദ്യോഗികമായി ഒരു പ്രസ്താവന ഇറക്കി. ഇന്ത്യയുടെ ഊർജ്ജ ഇറക്കുമതി തീരുമാനങ്ങൾ വിപണിയിലെ സാഹചര്യങ്ങളെ ആശ്രയിച്ചുള്ളതാണെന്നും, 140 കോടി ജനങ്ങളുടെ ഊർജ്ജ സുരക്ഷ ഉറപ്പാക്കുകയാണ് ലക്ഷ്യമെന്നും മന്ത്രാലയം വ്യക്തമാക്കി. റഷ്യയിൽ നിന്ന് എണ്ണ വാങ്ങുന്നത് പോലുള്ള കാര്യങ്ങൾ മറ്റ് പല രാജ്യങ്ങളും അവരുടെ ദേശീയ താൽപ്പര്യങ്ങൾ സംരക്ഷിക്കാൻ വേണ്ടി ചെയ്യുന്നുണ്ടെന്നും, എന്നിട്ടും ഇന്ത്യയെ മാത്രം തിരഞ്ഞുപിടിച്ച് ശിക്ഷിക്കുന്നത് ‘തികച്ചും നിർഭാഗ്യകര’മാണെന്നും മന്ത്രാലയം കൂട്ടിച്ചേർത്തു.
യുക്രെയ്ൻ യുദ്ധത്തിന് ശേഷം പരമ്പരാഗത എണ്ണ വിതരണക്കാർ യൂറോപ്പിലേക്ക് തിരിഞ്ഞപ്പോഴാണ് ഇന്ത്യ റഷ്യയിൽ നിന്ന് എണ്ണ വാങ്ങാൻ തുടങ്ങിയതെന്ന് ഇന്ത്യ ചൂണ്ടിക്കാട്ടി. ഇത് ആഗോള എണ്ണവില നിയന്ത്രിച്ചു നിർത്താൻ സഹായിച്ച ഒരു നടപടിയാണെന്നും ഇന്ത്യ വാദിക്കുന്നു. അമേരിക്കയും യൂറോപ്യൻ യൂണിയനും ഉൾപ്പെടെ പല പാശ്ചാത്യ രാജ്യങ്ങളും റഷ്യയുമായി ഇപ്പോഴും വ്യാപാരത്തിൽ ഏർപ്പെടുന്നുണ്ടെന്നും ഇന്ത്യ നേരത്തെ തുറന്നടിച്ചിരുന്നു.
അമേരിക്കയുടെ താരിഫ് വർധനവ് ഇന്ത്യയുടെ കയറ്റുമതിയെ ബാധിക്കുമെന്നതിനാൽ, ഇത് നേരിടാൻ 20,000 കോടി രൂപയുടെ പദ്ധതിക്ക് കേന്ദ്ര സർക്കാർ രൂപം നൽകിയതായി റിപ്പോർട്ടുകളുണ്ട്. കയറ്റുമതിക്കാരെ സഹായിക്കുന്നതിനും ‘മെയ്ഡ് ഇൻ ഇന്ത്യ’ ഉൽപ്പന്നങ്ങൾക്ക് പ്രാധാന്യം നൽകുന്നതിനും ഇതിലൂടെ ലക്ഷ്യമിടുന്നു. താരിഫ് വർധനവ് ഇന്ത്യയുടെ സാമ്പത്തിക മേഖലയ്ക്ക് കനത്ത വെല്ലുവിളിയാകുമെന്നാണ് വിലയിരുത്തൽ.
