സുമോദ് തോമസ് നെല്ലിക്കാല
ഫിലാഡൽഫിയ: ഇന്ത്യൻ ഓവർസീസ് കോൺഗ്രസ് (ഐ.ഒ.സി.) കേരള ചാപ്റ്റർ, പെൻസിൽവാനിയ ഘടകം സംഘടിപ്പിക്കുന്ന 78-ാമത് ഇന്ത്യൻ സ്വാതന്ത്ര്യദിനാഘോഷങ്ങൾക്ക് പ്രശസ്ത സിനിമാ, ടി.വി. പിന്നണി പ്രവർത്തകനും, തിരക്കഥാകൃത്തും, സ്റ്റാൻഡ് അപ്പ് കൊമേഡിയനുമായ സുനീഷ് വാരനാട് നേതൃത്വം നൽകും. കേരള സാഹിത്യ അക്കാദമി അവാർഡ് ജേതാവ് കൂടിയാണ് സുനീഷ് വാരനാട്.
‘ഗോഡ്ഫാദർ’, ‘റാംജി റാവ് സ്പീക്കിംഗ്’ പോലുള്ള നിരവധി സിനിമകൾക്കും, ‘ബഡായി ബംഗ്ലാവ്’, ‘പൊളിട്രിക്സ്’ ഉൾപ്പെടെയുള്ള ടെലിവിഷൻ ഷോകൾക്കും തിരക്കഥ എഴുതിയിട്ടുള്ള അദ്ദേഹം, മികച്ച സ്റ്റാൻഡ് അപ്പ് കൊമേഡിയൻ എന്ന നിലയിലും ജനപ്രീതി നേടിയിട്ടുണ്ട്.
സ്വാതന്ത്ര്യദിനാഘോഷങ്ങളുടെ ഭാഗമായി പ്രശസ്ത സിനിമ പിന്നണി ഗായകർ അവതരിപ്പിക്കുന്ന ഗാനമേള ഉൾപ്പെടെ മികച്ച കലാപ്രകടനങ്ങളാണ് ഐ.ഒ.സി. പെൻസിൽവാനിയ ചാപ്റ്റർ ഇത്തവണ ഒരുക്കിയിരിക്കുന്നത്.
പരിപാടികൾ ഓഗസ്റ്റ് 16, ശനിയാഴ്ച വൈകിട്ട് 4:00 മണിക്ക് (EST) ഫിലാഡൽഫിയയിലെ ക്രിസ്റ്റോസ് ചർച്ച് ഓഡിറ്റോറിയത്തിൽ വെച്ച് (9999 Gantry Rd, Philadelphia, PA 19115) നടക്കും. കോൺഗ്രസ് നേതാവും കാസർകോട് എം.പി.യുമായ രാജ്മോഹൻ ഉണ്ണിത്താൻ മുഖ്യാതിഥിയാകും. കേരള രാഷ്ട്രീയത്തിൽ ഏറെക്കാലമായി സജീവമായ രാജ്മോഹൻ ഉണ്ണിത്താൻ 2019 മുതൽ കാസർഗോഡ് എം.പി.യാണ്. കെ.പി.സി.സി. സെക്രട്ടറിയായും വക്താവായും പ്രവർത്തിച്ചിട്ടുണ്ട്. പൊതുസംവാദങ്ങളിലും ടെലിവിഷൻ ചർച്ചകളിലും മൂർച്ചയേറിയ പ്രതികരണങ്ങളിലൂടെ അദ്ദേഹം ശ്രദ്ധ നേടിയിട്ടുണ്ട്.
ഐ.ഒ.സി. കേരള ചാപ്റ്റർ ഭാരവാഹികൾ ഉൾപ്പെടെ, സാമൂഹിക-സാംസ്കാരിക നേതാക്കളും അമേരിക്കൻ രാഷ്ട്രീയ പ്രതിനിധികളും പരിപാടിയിൽ പങ്കെടുക്കും. പ്രവാസി ഇന്ത്യൻ സമൂഹം എന്ന നിലയിൽ, സ്വാതന്ത്ര്യത്തിനും ജനാധിപത്യത്തിനും വേണ്ടി പോരാടിയ മഹാത്മാഗാന്ധി, ജവഹർലാൽ നെഹ്റു, സർദാർ വല്ലഭായ് പട്ടേൽ, സുഭാഷ് ചന്ദ്രബോസ്, മൗലാന ആസാദ്, ബി.ആർ. അംബേദ്കർ തുടങ്ങിയ ധീരരായ നേതാക്കളുടെ ത്യാഗത്തെ ഓർമ്മിക്കാനും ആഘോഷിക്കാനുമുള്ള സമയമാണിതെന്നും ഭാരവാഹികൾ അറിയിച്ചു.
അത്താഴവിരുന്നോടു കൂടിയായിരിക്കും പരിപാടികൾ സമാപിക്കുക. പ്രവേശനം സൗജന്യമായിരിക്കും.
കൂടുതൽ വിവരങ്ങൾക്ക്:
- പ്രസിഡന്റ്: ഡോ. ഈപ്പൻ ഡാനിയേൽ – 215 262 0709
- ചെയർമാൻ: സാബു സ്കറിയ – 267 980 7923
- ജനറൽ സെക്രട്ടറി: സുമോദ് ടി നെല്ലിക്കാല – 267 322 8527
- ട്രഷറർ: ഫിലിപ്പോസ് ചെറിയാൻ – 215 605 7310
Indian Independence Day Celebration: IOC Pennsylvania Chapter Events to be Led by Suneesh Varanad
