ലോസ് ആഞ്ചലസ് ∙ വിഖ്യാത ഹോളിവുഡ് നടിയും അമേരിക്കൻ സാംസ്കാരിക ചിഹ്നവുമായ മെർലിൻ മൺറോ അന്തരിച്ച ലോസ് ആഞ്ചലസിലെ വീട് ഇടിച്ചുനിരത്തൽ ഭീഷണി നേരിടുന്നു. വീടിന്റെ ഇപ്പോഴത്തെ ഉടമസ്ഥർ വീടു പൊളിക്കാനുള്ള അനുമതി തേടി കോടതിയെ സമീപിക്കുകയും കോടതി അത് അനുവദിക്കുകയും ചെയ്തു. എന്നാൽ ഈ കെട്ടിടത്തിന് ‘ചരിത്രസ്മാരകം’ എന്ന പദവിയുള്ളതിനാൽ ഉടമകൾക്ക് ഇപ്പോൾ അത് പൊളിക്കാനാവില്ല.
2023ൽ ആണ് ഇപ്പോഴത്തെ ഉടമകൾ 8.35 മില്യൺ യുഎസ് ഡോളറിന് ഈ വീട് വാങ്ങിയത്. ലോസ് ആഞ്ചലസിലെ പല വീടുകളിലും പല അഭിനേതാക്കളും താമസിച്ചിട്ടുണ്ടെന്നതിനാൽ അവയെല്ലാം ചരിത്രസ്മാരകങ്ങളാകണമോ എന്നതാണ് ഉടമകളുടെ ചോദ്യം. മരിക്കുന്നതിന് ആറു മാസം മുൻപാണ് മെർലിൻ ഈ വീട് വാങ്ങിയത്. ജീവിതത്തിൽ സ്വന്തമാക്കിയ ആദ്യ വീടും ഇതായിരുന്നു. വീട് ഇടിച്ചുനിരത്തുന്നതിനെ പല ഹോളിവുഡ് പ്രേമികളും മെർലിൻ ആരാധകരും ശക്തമായി എതിർക്കുന്നു. ഹോളിവുഡിന്റെ ചരിത്രത്തിൽ വലിയ സ്ഥാനമുള്ള വനിത ജീവിച്ച വീട് സംരക്ഷിക്കപ്പെടണമെന്നാണ് അവരുടെ വാദം.
യഥാർത്ഥ പേര് നോർമ ജീൻ മോർട്ടൻസൺ ആയ മെർലിൻ മൺറോ 1926ൽ യുഎസിലെ ലോസ് ആഞ്ചലസിലാണു ജനിച്ചത്. 1950–60 കാലഘട്ടത്തിൽ ഹോളിവുഡിലെ ഏറ്റവും തിരക്കുള്ള നടിയായി അവർ മാറി. ആ കാലത്ത് ലോകത്തിലെ ഏറ്റവും പ്രശസ്തയായ അമേരിക്കൻ നടിയെന്ന പേരും നേടി. അമേരിക്കൻ സിനിമയും വിനോദവ്യവസായവും പോപ് സംസ്കാരവും ഒരുപോലെ സ്വാധീനിച്ച വ്യക്തിത്വമായിരുന്നു മെർലിൻ.
മെർലിനുമായി ബന്ധപ്പെട്ട നിരവധി വസ്തുക്കൾ ഉയർന്ന വിലയ്ക്ക് വിറ്റുപോയിട്ടുണ്ട്. ചിത്രകാരൻ ആൻഡി വാർഹോൾ വരച്ച ഷോട്ട് സേജ് ബ്ലൂ മെർലിൻ എന്ന പെയിന്റിങ് 2022-ൽ 195 മില്യൺ യുഎസ് ഡോളർ (ഏകദേശം 1,500 കോടി രൂപ) വിലയ്ക്ക് ലേലത്തിൽ വിറ്റു. 1964-ൽ വരച്ച ഈ ചിത്രം മെർലിന്റെ പ്രശസ്തമായ മുഖചിത്രത്തെ അടിസ്ഥാനമാക്കിയായിരുന്നു. ഇരുപതാം നൂറ്റാണ്ടിലെ കലാസൃഷ്ടികളിൽ ഏറ്റവും ഉയർന്ന വില ലഭിച്ചതും ഏറ്റവും വിലപിടിപ്പുള്ള അമേരിക്കൻ കലാസൃഷ്ടി എന്ന ബഹുമതിയും ഇതിനാണ്.
അമേരിക്കയിലെ ഏറ്റവും കൂടുതൽ ചർച്ചയായ പ്രണയകഥകളിലൊന്നാണ് ജോൺ എഫ്. കെന്നഡിയും മെർലിൻ മൺറോയും തമ്മിലുള്ളത്. യഥാർത്ഥത്തിൽ പ്രണയം ഉണ്ടായിരുന്നോ എന്ന കാര്യത്തിൽ ഉറപ്പില്ലെങ്കിലും ഇന്നും ഇത് ചർച്ചചെയ്യപ്പെടുന്നു. 1962 ഓഗസ്റ്റ് 4ന്, വെറും 36 വയസ്സിൽ മെർലിൻ അന്തരിച്ചു. അതേ വർഷം പിന്നീട് കെന്നഡിയെയും വധിച്ചു.
1962-ൽ ജോൺ എഫ്. കെന്നഡിയുടെ 45-ാം ജന്മദിനാഘോഷത്തിൽ ‘ഹാപ്പി ബർത്ത്ഡേ മിസ്റ്റർ പ്രസിഡന്റ്’ എന്ന് മെർലിൻ പാടിയത് ചരിത്രപ്രസിദ്ധമായ ഒരു പ്രകടനമായി. അന്ന് അവർ ധരിച്ച വസ്ത്രം 2,500 ക്രിസ്റ്റലുകൾ കൈകൊണ്ടു തുന്നിച്ചേർത്ത അതിസൂക്ഷ്മമായിരുന്നുവെന്നും ശരീരത്തോട് ഇഴുകിക്കിടന്നതിനാൽ ധരിക്കാൻ തന്നെ ബുദ്ധിമുട്ടുണ്ടാക്കിയെന്നും പറയുന്നു. സ്റ്റേജിലെ ലൈറ്റിൽ ക്രിസ്റ്റലുകൾ തിളങ്ങിയത് “ആയിരം മിന്നാമിനുങ്ങുകളെ ധരിച്ചിരിക്കുന്നതുപോലെ” എന്നായിരുന്നു ആ രംഗത്തിന് നൽകിയ ഉപമ. 1,500 യുഎസ് ഡോളറിനായിരുന്നു അവർ അത് വാങ്ങിയത്. പിന്നീട് 1.2 മില്യൺ യുഎസ് ഡോളറിന് ലേലത്തിൽ വിറ്റു.
Marilyn Monroe’s only home in Los Angeles, now facing demolition despite its historic landmark status, has sparked a major debate over cultural preservation.
