നാഗാലാൻഡ് ഗവർണറും മുൻ തമിഴ്നാട് ബിജെപി പ്രസിഡന്റുമായ ലാ ഗണേശൻ (80) ചെന്നൈയിലെ സ്വകാര്യ ആശുപത്രിയിൽ അന്തരിച്ചു. ഈ മാസം 8 ന് ചെന്നൈ ടി നഗറിലെ വീട്ടിൽ വീണ് തലയ്ക്ക് പരിക്കേറ്റതിനെ തുടർന്ന് ആശുപത്രിയിൽ പ്രവേശിപ്പിച്ചിരുന്നു. വൈകിട്ട് 6:23 ഓടെ ചികിത്സയിൽ കഴിയവെ ആയിരുന്നു അന്ത്യം. ആർഎസ്എസ്സിൽ സജീവ പ്രവർത്തകനായിരുന്ന അദ്ദേഹം പിന്നീട് ബിജെപി ദേശീയ വൈസ് പ്രസിഡന്റായും കേരളത്തിന്റെ ചുമതലയും വഹിച്ചിരുന്നു.
2021 മുതൽ 2023 വരെ മണിപ്പൂർ ഗവർണറായി സേവനമനുഷ്ഠിച്ച ലാ ഗണേശൻ, 2023 ഫെബ്രുവരി മുതൽ നാഗാലാൻഡ് ഗവർണറായി ചുമതലയേറ്റു. മധ്യപ്രദേശിൽ നിന്ന് രാജ്യസഭാ എംപിയായും പ്രവർത്തിച്ചിട്ടുണ്ട്. രാഷ്ട്രീയ-സാമൂഹിക രംഗങ്ങളിൽ നിറസാന്നിധ്യമായിരുന്ന അദ്ദേഹത്തിന്റെ വിയോഗം വലിയ നഷ്ടമാണെന്നാണ് പ്രമുഖ രാഷ്ട്രീയ നേതാക്കളുടെ പ്രതികരണം.
