പാറ്റേഴ്സൺ: ന്യൂജേഴ്‌സിയിലെ മലയാളി സമൂഹം ഈ വർഷത്തെ ഓണം ആഘോഷിക്കാൻ ഒരുങ്ങുന്നു. മലയാളി അസോസിയേഷൻ ഓഫ് ന്യൂജേഴ്‌സി (MANJ), കേരള കൾച്ചറൽ ഫോറം (KCF) എന്നിവയുടെ നേതൃത്വത്തിൽ സംയുക്തമായി ഓണാഘോഷം സംഘടിപ്പിക്കും. സെപ്റ്റംബർ 13 ശനിയാഴ്ച ഉച്ചയ്ക്ക് പാറ്റേഴ്സണിലുള്ള സെൻ്റ് ജോർജ് സിറോ മലബാർ ചർച്ച് ഓഡിറ്റോറിയമാണ് ആഘോഷങ്ങൾക്ക് വേദിയാകുന്നത്.
കേരളത്തിന്റെ വിളവെടുപ്പ് ഉത്സവമായ ഓണം, ഐക്യത്തിൻ്റെയും സന്തോഷത്തിൻ്റെയും പ്രതീകമാണ്. വിവിധ കലാപരിപാടികളും രുചികരമായ ഓണസദ്യയും ഈ വർഷത്തെ ആഘോഷങ്ങൾക്ക് മാറ്റ് കൂട്ടും. തിരുവാതിര, ചെണ്ടമേളം, മാവേലി എഴുന്നള്ളത്ത്, പൂക്കളം, സംഗീത നൃത്ത പരിപാടികൾ എന്നിവ ആഘോഷങ്ങളുടെ ഭാഗമാകും. പ്രശസ്ത കലാകാരന്മാർ അണിനിരക്കുന്ന ഗാനമേളയും ഉണ്ടായിരിക്കും.
വിഭവസമൃദ്ധമായ പരമ്പരാഗത ഓണസദ്യ വാഴയിലയിൽ വിളമ്പും. കുടുംബങ്ങൾക്കും സുഹൃത്തുക്കൾക്കും ഒത്തുചേർന്ന് കേരളത്തിന്റെ സമ്പന്നമായ പൈതൃകവും സംസ്കാരവും അടുത്തറിയാനുള്ള ഒരു സുവർണ്ണാവസരമാണ് ഈ ആഘോഷം ഒരുക്കുന്നത്. ആഘോഷങ്ങളിൽ പങ്കെടുക്കാൻ എല്ലാവരെയും സ്വാഗതം ചെയ്യുന്നതായി സംഘാടകർ അറിയിച്ചു.
കൂടുതൽ വിവരങ്ങൾ ഫ്ലയറിൽ ലഭ്യമാണ്.
രാജു ജോയ് (President: MANJ) അറിയിച്ചതാണിത്.
