കൊച്ചി: മാസപ്പടി കേസിൽ മുൻ എംഎൽഎ പി.സി. ജോർജിൻ്റെ മകൻ ഷോൺ ജോർജിന് ഹൈക്കോടതിയിൽ നിന്ന് തിരിച്ചടി. സിഎംആർഎൽ കമ്പനിയിൽ നിന്ന് എസ്എഫ്ഐഒ (SFIO) പിടിച്ചെടുത്ത ഡയറിയുടെ പകർപ്പ് ആവശ്യപ്പെട്ട് ഷോൺ ജോർജ് നൽകിയ ഹർജി ഹൈക്കോടതി തള്ളി.
മാസപ്പടിക്കേസിലെ നിർണായക വിവരങ്ങൾ ഡയറിയിലുണ്ടെന്നും, ഇത് അന്വേഷണത്തെ സ്വാധീനിക്കാൻ സാധ്യതയുണ്ടെന്നും ചൂണ്ടിക്കാട്ടിയാണ് ഷോൺ ജോർജ് ഹർജി സമർപ്പിച്ചത്. എന്നാൽ ഈ വാദം തള്ളിക്കൊണ്ട് കോടതി ഹർജി തള്ളുകയായിരുന്നു. ഇതോടെ, ഡയറിയുടെ പകർപ്പ് ലഭിക്കാതെ ഷോൺ ജോർജിന് കേസുമായി ബന്ധപ്പെട്ട തുടർനടപടികളിലേക്ക് പോകാൻ കഴിയില്ല.
മാസപ്പടി വിവാദത്തിൽ എസ്എഫ്ഐഒ അന്വേഷണവുമായി ബന്ധപ്പെട്ട ചില രേഖകൾ ഭാഗികമായി ഷോൺ ജോർജിന് കൈമാറണമെന്ന വിചാരണക്കോടതിയുടെ ഉത്തരവ് റദ്ദാക്കിക്കൊണ്ടാണ് ഹൈക്കോടതിയുടെ ഈ വിധി.
എസ്എഫ്ഐഒ അന്വേഷണം സ്റ്റേ ചെയ്യണമെന്ന ഷോൺ ജോർജിന്റെ ആവശ്യം നേരത്തെ ഹൈക്കോടതി തള്ളിയിരുന്നു. അന്വേഷണവുമായി ബന്ധപ്പെട്ട് ഷോൺ ജോർജിന്റെ കൈവശമുള്ള രേഖകൾ കരിമണൽ കമ്പനിക്ക് കൈമാറണമെന്നും അതിനുശേഷം മാത്രം കേസുമായി മുന്നോട്ട് പോയാൽ മതിയെന്നും ഹൈക്കോടതി നിർദേശിച്ചിരുന്നു.
അതിനുശേഷം ഷോൺ ജോർജ് വിചാരണക്കോടതിയിൽ സമർപ്പിച്ച ഹർജി പരിഗണിച്ച കോടതി, എസ്എഫ്ഐഒ അന്വേഷണവുമായി ബന്ധപ്പെട്ട ചില രേഖകൾ ഷോൺ ജോർജിന് കൈമാറണമെന്ന് ഉത്തരവിട്ടിരുന്നു. എന്നാൽ ഈ ഉത്തരവാണ് ഇപ്പോൾ ഹൈക്കോടതി റദ്ദാക്കിയത്. രേഖകൾ കൈമാറണമെന്ന ഉത്തരവ് തെറ്റാണെന്നും അത് നിയമവിരുദ്ധമാണെന്നും കമ്പനി സമർപ്പിച്ച ഹർജിയിൽ ചൂണ്ടിക്കാട്ടിയിരുന്നു. ഈ വാദം അംഗീകരിച്ചുകൊണ്ടാണ് ഇപ്പോൾ ഹൈക്കോടതി വിധി പുറപ്പെടുവിച്ചിരിക്കുന്നത്.
