തിരുവനന്തപുരം: ഫുട്ബോൾ ഇതിഹാസം ലയണൽ മെസിയുടെ നേതൃത്വത്തിൽ അർജന്റീന ദേശീയ ഫുട്ബോൾ ടീം നവംബറിൽ കേരളത്തിലെത്തുമെന്ന് കായിക മന്ത്രി വി. അബ്ദുറഹിമാൻ വ്യക്തമാക്കി. മെസിയുടെ ഇന്ത്യാ സന്ദർശനം സ്വകാര്യ സന്ദർശനത്തിന്റെ ഭാഗമാണെന്നും ഇത് അർജന്റീന ഫുട്ബോൾ അസോസിയേഷന്റെ ഔദ്യോഗിക അറിവോടെയല്ലെന്നും മന്ത്രി അറിയിച്ചു. എന്നിരുന്നാലും, ടീമിന്റെ വരവിനായി സംസ്ഥാന സർക്കാർ എല്ലാ സുരക്ഷാ സംവിധാനങ്ങളും ഒരുക്കുന്നുണ്ടെന്ന് അദ്ദേഹം ഉറപ്പുനൽകി.
ആദ്യം പ്രഖ്യാപിച്ച സ്‌പോൺസർ മാറിയപ്പോൾ ചില ആശങ്കകൾ ഉയർന്നിരുന്നെങ്കിലും, പുതിയ സ്‌പോൺസറുമായി നടന്ന ചർച്ചകളിൽ അർജന്റീന ഫുട്ബോൾ അസോസിയേഷൻ നവംബർ സന്ദർശനം സ്ഥിരീകരിച്ചതായി മന്ത്രി വെളിപ്പെടുത്തി. തന്റെ സ്‌പെയിൻ സന്ദർശനം അർജന്റീന ടീമുമായി ചർച്ച നടത്തുന്നതിനു മാത്രമല്ല, തിരുവനന്തപുരത്തെ പുതിയ സ്റ്റേഡിയം നിർമാണവുമായി ബന്ധപ്പെട്ട് സ്‌പെയിനിലെ സ്‌പോർട്സ് കൗൺസിലുമായി ചർച്ച നടത്താനും കൂടിയായിരുന്നുവെന്ന് മന്ത്രി വ്യക്തമാക്കി.
