ജോസ് മാളേയ്ക്കൽ
ഫിലാഡൽഫിയ: ഷിക്കാഗോ സെന്റ് തോമസ് സീറോമലബാർ രൂപതയുടെ ഒരു വർഷം നീണ്ടുനിൽക്കുന്ന രജതജൂബിലി ആഘോഷങ്ങളുടെ ഭാഗമായി രൂപതയിലെ ഇടവകകളും മിഷനുകളും നവീകരണ ധ്യാനങ്ങൾ, തീർത്ഥാടനയാത്രകൾ, ബൈബിൾ പഠനങ്ങൾ, ദിവ്യകാരുണ്യ ആരാധന എന്നിവ നടത്തിവരുന്നു. ആത്മീയ നവീകരണത്തിനായി ഫിലാഡൽഫിയ ഫൊറോനാ ദേവാലയം ഈ ജൂബിലി വർഷത്തിൽ പ്രസിദ്ധ മരിയൻ തീർത്ഥാടനകേന്ദ്രവും മൈനർ ബസിലിക്കയുമായ ജർമ്മൻടൗൺ മിറാക്കുലസ് മെഡൽ ഷ്രൈനിലേക്ക് ഒരു ജൂബിലി തീർത്ഥാടനം നടത്തുകയാണ്.
എട്ടുനോമ്പിനോടനുബന്ധിച്ച് എല്ലാ വർഷവും നടത്തിവരാറുള്ള ഈ പ്രാർത്ഥനാപൂർണമായ മരിയൻ തീർത്ഥാടനവും വേളാങ്കണ്ണി മാതാവിന്റെ തിരുനാളും ഈ വർഷം സെപ്റ്റംബർ 6 ശനിയാഴ്ച പൂർവാധികം ഭക്തിപൂർവം ആഘോഷിക്കും. ജർമ്മൻടൗണിന് ഒരു തിലകമായി നിലകൊള്ളുന്ന മിറാക്കുലസ് മെഡൽ തീർത്ഥാടനകേന്ദ്രത്തിൽ (The Basilica Shrine of Our Lady of the Miraculous Medal; 475 E. Chelten Avenue, Philadelphia, PA 19144) തുടർച്ചയായി ഇത് പതിനാലാം വർഷമാണ് വേളാങ്കണ്ണി മാതാവിന്റെ തിരുനാൾ ആഘോഷിക്കുന്നത്. വിവിധ ഇന്ത്യൻ ക്രൈസ്തവസമൂഹങ്ങളുടെയും ഫിലാഡൽഫിയ സീറോമലബാർ ഫൊറോനാപള്ളിയുടെയും സഹകരണത്തോടെ മിറാക്കുലസ് മെഡൽ തീർത്ഥാടനകേന്ദ്രമാണ് തിരുനാളിന് നേതൃത്വം നൽകുന്നത്.
സെപ്റ്റംബർ 6 ശനിയാഴ്ച വൈകുന്നേരം നാലുമണിമുതൽ ആരംഭിക്കുന്ന തിരുനാൾ കർമ്മങ്ങളിലേക്ക് എല്ലാ മരിയഭക്തരെയും വിശ്വാസികളെയും സെൻട്രൽ അസോസിയേഷൻ ഓഫ് മിറാക്കുലസ് മെഡൽ ഷ്രൈൻ റെക്ടർ ഫാ. ജോൺ കെറ്റിൽബർഗർ സി. എം., സീറോമലബാർ പള്ളി വികാരി റവ. ഡോ. ജോർജ് ദാനവേലിൽ, കൈക്കാരന്മാർ എന്നിവർ സംയുക്തമായി ക്ഷണിക്കുന്നു.
കിഴക്കിന്റെ ലൂർദ് എന്നറിയപ്പെടുന്ന വേളാങ്കണ്ണിയിലെ ആരോഗ്യമാതാവിന്റെ (Our Lady of Good Health) തിരുസ്വരൂപം 2012 സെപ്റ്റംബർ എട്ടിനാണ് ഫിലാഡൽഫിയ ജർമ്മൻടൗൺ മിറാക്കുലസ് മെഡൽ ഷ്രൈനിൽ ആശീർവദിച്ച് പ്രതിഷ്ഠിച്ചത്. അന്നുമുതൽ ഒരു വ്യാഴവട്ടക്കാലമായി മുടങ്ങാതെ എല്ലാ വർഷങ്ങളിലും ഈ തിരുനാൾ ആഘോഷമായി നടത്തിവരുന്നു. മൈനർ ബസിലിക്കയായി ഉയർത്തപ്പെട്ടതിനുശേഷം ഇത് മൂന്നാം തവണയാണ് വേളാങ്കണ്ണി മാതാവിന്റെ തിരുനാൾ ആഘോഷിക്കുന്നത്.
എല്ലാ തിങ്കളാഴ്ച ദിവസങ്ങളിലും ജർമ്മൻടൗൺ മിറാക്കുലസ് മെഡൽ ഷ്രൈനിൽ രാവിലെ മുതൽ വൈകുന്നേരം വരെ വിവിധ സമയങ്ങളിൽ നടക്കുന്ന വി. കുർബാനയിലും നൊവേനയിലും മലയാളികൾ ഉൾപ്പെടെ നൂറുകണക്കിന് മരിയഭക്തർ പങ്കെടുക്കാറുണ്ട്.
മിറാക്കുലസ് മെഡൽ നൊവേന, ആഘോഷമായ തിരുനാൾ കുർബാന, വേളാങ്കണ്ണി മാതാവിന്റെ നൊവേന, വേളാങ്കണ്ണി മാതാവിന്റെ തിരുസ്വരൂപം വഹിച്ചുകൊണ്ടുള്ള ഭക്തിനിർഭരമായ പ്രദക്ഷിണം, വിവിധ ഇന്ത്യൻ ഭാഷകളിലുള്ള ജപമാല പ്രാർത്ഥന, തിരുസ്വരൂപം വണങ്ങി നേർച്ച സമർപ്പണം എന്നിവയാണ് തിരുനാൾ ദിവസത്തെ തിരുക്കർമ്മങ്ങൾ.
സീറോമലബാർ പള്ളി വികാരി റവ. ഡോ. ജോർജ് ദാനവേലിൽ, റവ. ഫാ. ജോസി കൊല്ലമ്പറമ്പിൽ, റവ. ഫാ. ജസ്റ്റിൻ പനച്ചിക്കൽ, റവ. ഫാ. ജോൺ കെറ്റിൽബർഗർ സി. എം. (സെൻട്രൽ അസോസിയേഷൻ ഓഫ് മിറാക്കുലസ് മെഡൽ ഷ്രൈൻ) എന്നിവർ തിരുക്കർമ്മങ്ങൾക്ക് നേതൃത്വം നൽകും.
സീറോമലബാർ ഇടവകയും വിവിധ ഇന്ത്യൻ ക്രൈസ്തവരും ഒന്നിച്ചുചേർന്ന് നടത്തുന്ന ഈ തിരുനാളിൽ പങ്കെടുത്ത് ആരോഗ്യമാതാവിന്റെ അനുഗ്രഹങ്ങളും വിശേഷാൽ ജൂബിലി ദണ്ഡവിമോചനവും പ്രാപിക്കാൻ മരിയഭക്തർക്ക് ഒരു സുവർണാവസരമാണിത്. ഇന്ത്യൻ-അമേരിക്കൻ ക്രൈസ്തവ വിശ്വാസ പാരമ്പര്യത്തിന്റെയും പൈതൃകത്തിന്റെയും മരിയൻ ഭക്തിയുടെയും ഈ അത്യപൂർവമായ ഒത്തുചേരലിലേക്ക് ജാതി-മത ഭേദമെന്യേ എല്ലാവർക്കും സ്വാഗതം.
സീറോമലബാർ ഇടവക വികാരി റവ. ജോർജ് ദാനവേലിൽ, കൈക്കാരന്മാരായ ജോസ് തോമസ് (തിരുനാൾ കോർഡിനേറ്റർ), സജി സെബാസ്റ്റ്യൻ, ജോജി ചെറുവേലിൽ, പോളച്ചൻ വറീദ്, ജെറി കുരുവിള, സെക്രട്ടറി ടോം പാറ്റാനിയിൽ എന്നിവരുടെ നേതൃത്വത്തിൽ പാരിഷ് കൗൺസിൽ അംഗങ്ങൾ, ഭക്തസംഘടനകൾ, മതബോധന സ്കൂൾ എന്നിവർ തിരുനാളിന്റെ ക്രമീകരണങ്ങൾ ചെയ്തുവരുന്നു.
The Feast of Our Lady of Velankanni enters its 14th year at the Philadelphia Germantown Miraculous Medal Pilgrimage Center
