കൊച്ചി: നിലവിൽ നിയമപരമായി വിവാഹബന്ധത്തിലുള്ള ഒരു സ്ത്രീയെ വിവാഹവാഗ്ദാനം നൽകി പീഡിപ്പിച്ചുവെന്ന് പറയാൻ കഴിയില്ലെന്ന് കേരള ഹൈക്കോടതി നിരീക്ഷിച്ചു. അത്തരമൊരു ആരോപണം നിയമപരമായി നിലനിൽക്കില്ലെന്നും കോടതി വ്യക്തമാക്കി. വിവാഹവാഗ്ദാനം നൽകി ഒരുമിച്ച് താമസിച്ച സ്ത്രീയെ ലൈംഗികമായി പീഡിപ്പിച്ചുവെന്ന കേസിൽ ഒരു പോലീസുകാരന് ജാമ്യം അനുവദിച്ചുകൊണ്ടാണ് ജസ്റ്റിസ് ബെച്ചു കുര്യൻ തോമസ് ഈ നിരീക്ഷണം നടത്തിയത്.
കേസിലെ ഹർജിക്കാരനായ പോലീസ് സബ് ഇൻസ്പെക്ടർക്കെതിരെ 2016 മുതൽ 2025 വരെയുള്ള കാലയളവിൽ ലൈംഗികബന്ധം പുലർത്തിയെന്ന് പരാതിക്കാരി ആരോപിച്ചിരുന്നു. എന്നാൽ, നിയമപരമായി ഒരു വിവാഹബന്ധം വേർപെടുത്താതെ മറ്റൊരു വ്യക്തിയെ വിവാഹം കഴിക്കാമെന്ന് വാഗ്ദാനം ചെയ്യുന്നത് നിലനിൽക്കില്ലെന്ന് കോടതി ചൂണ്ടിക്കാട്ടി. പരാതിക്കാരിക്ക് മറ്റൊരു വിവാഹബന്ധമുണ്ടെന്നും, അവർ വേർപിരിഞ്ഞാണ് താമസിക്കുന്നതെങ്കിലും ആ വിവാഹം നിയമപരമായി വേർപെടുത്തിയിട്ടില്ലെന്നും കോടതി നിരീക്ഷിച്ചു. ഈ നിരീക്ഷണത്തിന് സുപ്രീം കോടതിയുടെ മുൻവിധിയും ഹൈക്കോടതി ചൂണ്ടിക്കാട്ടി.
പ്രതിയെ കസ്റ്റഡിയിൽ വെച്ച് ചോദ്യം ചെയ്യേണ്ടതിന്റെ ആവശ്യകത സ്ഥാപിക്കുന്നതിൽ പ്രോസിക്യൂഷൻ പരാജയപ്പെട്ടുവെന്നും, ഹർജിക്കാരനെ കസ്റ്റഡിയിൽ വെച്ച് ചോദ്യം ചെയ്യേണ്ട ആവശ്യമില്ലെന്നും കോടതി നിരീക്ഷിച്ചു. 2025 ജൂലൈ വരെ ഇരുവരും ഒരുമിച്ചാണ് താമസിച്ചിരുന്നതെന്ന് പരാതിയിൽ പറയുന്നു. അതേസമയം, ഹർജിക്കാരനായ പോലീസ് സബ് ഇൻസ്പെക്ടർ ഈ വർഷം ജനുവരിയിൽ മറ്റൊരു വിവാഹം കഴിച്ചുവെന്നും പരാതിക്കാരി ആരോപിച്ചിട്ടുണ്ട്.
The Kerala High Court granted bail to a police officer in a sexual assault case
