യൂണിഫൈഡ് പേയ്‌മെന്റ് ഇന്റർഫേസ് (യു.പി.ഐ) ഇടപാടുകൾ എക്കാലത്തും സൗജന്യമായിരിക്കുമെന്നതല്ല സർക്കാർ നിലപാട് എന്ന് റിസർവ് ബാങ്ക് ഗവർണർ സഞ്ജയ് മൽഹോത്ര വ്യക്തമാക്കി. യു.പി.ഐ സംവിധാനം നിലനിൽക്കാൻ ചിലവുണ്ട്; അതിന് സുസ്ഥിരമായ ധനസ്രോതസ്സുകൾ ആവശ്യമാണ് എന്നും അദ്ദേഹം പറഞ്ഞു. പുതിയ വായ്പനയം പ്രഖ്യാപിച്ച ശേഷം നടന്ന മാധ്യമസമ്മേളനത്തിലാണ് ഗവർണറുടെ പരാമർശം.
“യു.പി.ഐ എപ്പോഴും സൗജന്യമായിരിക്കും എന്ന് ആർ.ബി.ഐ ഒരിക്കലും ഉറപ്പ് നൽകിയിട്ടില്ല. ഈ സേവനത്തിന് ചിലവുണ്ട്, അത് ഒറ്റ വ്യക്തിയോ സ്ഥാപനങ്ങളോ വഹിക്കേണ്ടി വരും. ദീർഘകാലതാല്പര്യത്തിൽ ഇത് അനിവാര്യമാകും,” ഗവർണർ വ്യക്തമാക്കി.
ഐ.സി.ഐ.സി.ഐ ബാങ്ക് യു.പി.ഐ ഇടപാടുകൾക്ക് ചാർജ് പ്രഖ്യാപിച്ചതിന് പിന്നാലെയാണ് ആർ.ബി.ഐയുടെ വിശദീകരണം.
അതേസമയം, യു.പി.ഐയുടെ വളർച്ച ഇന്ത്യയുടെ ഡിജിറ്റൽ സാമ്പത്തികമേഖലയ്ക്ക് പുതിയ അധ്യായം ചേർക്കുകയാണ്. അന്താരാഷ്ട്ര ധനനിധിയായ ഐ.എം.എഫ് പുറത്തുവിട്ട റിപ്പോർട്ട് പ്രകാരം, ഇന്ത്യയിലെ 85 ശതമാനം റീടെയിൽ പേയ്‌മെന്റുകളും യു.പി.ഐ വഴിയാണ് നടക്കുന്നത്. ആഗോളതലത്തിൽ നടപ്പിലാകുന്ന ഡിജിറ്റൽ ഇടപാടുകളിൽ 60% യു.പി.ഐ വഴിയാണെന്നതും റിപ്പോർട്ടിൽ വ്യക്തമാക്കുന്നു.
പ്രതിദിനം ശരാശരി 640 മില്യൺ ഇടപാടുകളും 24 ലക്ഷം കോടി രൂപയോളം മൂല്യമുള്ള ഇടപാടുകളും യു.പി.ഐ മുഖേന നടപ്പിലാകുന്നു. കഴിഞ്ഞ വർഷവുമായി താരതമ്യം ചെയ്യുമ്പോൾ 32 ശതമാനത്തിലധികം വർധന യു.പി.ഐ ഇടപാടുകളിൽ കാണാനാകുന്നുണ്ട്.
UPI Won’t Always Remain Free, Says RBI Governor; Indicates Need for Sustainable Funding Model
