ന്യൂയോർക്ക്: അന്യഗ്രഹ ജീവികൾ ഭൂമിയിൽനിന്നുള്ള ബഹിരാകാശ ആശയവിനിമയങ്ങൾ ശ്രദ്ധിക്കുന്നുണ്ടാവാം എന്ന് സൂചിപ്പിക്കുന്ന നിർണായക കണ്ടെത്തലുകളുമായി പുതിയ പഠനം. പെൻസിൽവാനിയ സ്റ്റേറ്റ് യൂണിവേഴ്സിറ്റിയിലെയും നാസയുടെ ജെറ്റ് പ്രൊപ്പൽഷൻ ലബോറട്ടറിയിലെയും ഗവേഷകർ സംയുക്തമായി നടത്തിയ പഠനത്തിലാണ് ഈ സാധ്യത പ്രവചിക്കുന്നത്. അന്യഗ്രഹ സംസ്‌കാരങ്ങൾക്ക് ഭൂമിയുടെ ബഹിരാകാശ ആശയവിനിമയങ്ങൾ കണ്ടെത്താൻ കഴിഞ്ഞേക്കുമെന്നും പഠനം പറയുന്നു.
സിഗ്നലുകൾ ലക്ഷ്യസ്ഥാനം കടന്നും സഞ്ചരിക്കുന്നു
ചൊവ്വ പര്യവേക്ഷണം ഉൾപ്പെടെ ബഹിരാകാശ പേടകങ്ങളിലേക്ക് ശാസ്ത്രജ്ഞർ അയയ്ക്കുന്ന റേഡിയോ സിഗ്നലുകൾ പൂർണ്ണമായി ലക്ഷ്യത്തിൽ അവസാനിക്കുന്നില്ല. സിഗ്നലുകളുടെ ഒരു ഭാഗം ബഹിരാകാശത്തിലൂടെ തുടർന്നും അനന്തമായി സഞ്ചരിക്കുന്നുണ്ടെന്ന് പഠനം വ്യക്തമാക്കുന്നു.
“ചൊവ്വ പോലുള്ള ഗ്രഹങ്ങൾ ഇത്തരം സിഗ്നലുകളെ പൂർണമായും ആഗിരണം ചെയ്യുന്നില്ല. അതുകൊണ്ടുതന്നെ തരംഗങ്ങളിൽ ഒരു പങ്ക് ബഹിരാകാശത്ത് യാത്ര തുടരുന്നു. ഈ യാത്രയെ ഖണ്ഡിക്കുന്ന ഏതെങ്കിലും ഗ്രഹങ്ങൾക്കോ പേടകങ്ങൾക്കോ തരംഗങ്ങളെ നിരീക്ഷിക്കാൻ കഴിയും,” ഗവേഷകർ വിശദീകരിക്കുന്നു.
അന്യഗ്രഹ ജീവികളെ കണ്ടെത്താനുള്ള പുതിയ വഴി
സൗരയൂഥത്തിന് പുറത്ത്, ഭൂമിക്ക് നേർരേഖയിൽ വരുന്ന ഇതര ഗ്രഹങ്ങളുടെ വിന്യാസം നിരീക്ഷിക്കുന്നത് അന്യഗ്രഹ ജീവികൾക്കായുള്ള പര്യവേക്ഷണങ്ങളിൽ നിർണായകമാവുമെന്നാണ് ഗവേഷകർ വിശ്വസിക്കുന്നത്.
- നാസ ഗ്രാന്റിന്റെ സയൻസ് പ്രിൻസിപ്പൽ ഇൻവെസ്റ്റിഗേറ്ററും പ്രബന്ധത്തിന്റെ ആദ്യ രചയിതാവുമായ പെൻ സ്റ്റേറ്റ് എബർലി കോളേജ് ഓഫ് സയൻസിലെ ജ്യോതിശാസ്ത്ര ബിരുദ വിദ്യാർത്ഥി പിഞ്ചൻ ഫാൻ പറയുന്നത് ഇതാണ്: “കഴിഞ്ഞ 20 വർഷത്തെ ഡാറ്റയുടെ അടിസ്ഥാനത്തിൽ, അന്യഗ്രഹ ജീവികൾ ഭൂമിയുടെയും ചൊവ്വയുടെയും സമാന്തരമായി വരികയാണെങ്കിൽ, നമ്മുടെ റേഡിയോ തരംഗ സംപ്രേഷണങ്ങളിൽ ഒന്നിന്റെ പാതയിൽ അവർ വരാനുള്ള സാധ്യത 77 ശതമാനമാണ്.”
- സൗരയൂഥത്തിലെ മറ്റേതെങ്കിലും ഗ്രഹവുമായി അവർ നേർരേഖയിലെത്തിയാൽ നമ്മുടെ സംപ്രേഷണങ്ങളുടെ പാതയിൽ അവർ വരാനുള്ള സാധ്യത 12 ശതമാനമാണെന്നും ഫാൻ കൂട്ടിച്ചേർത്തു.
ഈ പഠനം ആസ്‌ട്രോഫിസിക്കൽ ജേണൽ ലെറ്റേഴ്സിലാണ് പ്രസിദ്ധീകരിച്ചിരിക്കുന്നത്. ബഹിരാകാശ പര്യവേക്ഷണങ്ങളിലും അന്യഗ്രഹ ജീവികളെക്കുറിച്ചുള്ള പഠനങ്ങളിലും പുതിയ സാധ്യതകൾ തുറക്കുന്നതാണ് ഈ കണ്ടെത്തലുകൾ.
A joint study by NASA and Penn State University suggests that radio signals sent from Earth to spacecraft continue traveling into deep space, raising a 77% chance that extraterrestrial life could be intercepting our communications.
