തിരുവനന്തപുരം: ആഗോള അയ്യപ്പ സംഗമത്തിൽ പങ്കെടുക്കുന്ന പ്രതിനിധികളുടെ എണ്ണം 3250 ആയി ചുരുക്കി. ഓൺലൈൻ വഴി 4590 പേരാണ് സംഗമത്തിൽ പങ്കെടുക്കാൻ അപേക്ഷ നൽകിയിരുന്നത്. ഇവരിൽ ആദ്യം രജിസ്റ്റർ ചെയ്ത 3000 പേരെയും, ദേവസ്വം ബോർഡ് നേരിട്ട് ക്ഷണിക്കുന്ന 250 പേരെയും സംഗമത്തിനായി തിരഞ്ഞെടുത്തു. നിലവിൽ രജിസ്‌ട്രേഷൻ നടപടികൾ പൂർത്തിയായി.
വിവിധ വിഷയങ്ങൾ അവതരിപ്പിക്കുന്ന പ്രമുഖരെയും തീരുമാനിച്ചു. ശബരിമല മാസ്റ്റർ പ്ലാനിനെക്കുറിച്ച് കെ. ജയകുമാർ ഐ.എ.എസ്., മാത്യു ജോസഫ് എന്നിവർ വിഷയാവതരണം നടത്തും. ഇരുവരും മാസ്റ്റർ പ്ലാൻ ഹൈപ്പർ കമ്മിറ്റി അംഗങ്ങളാണ്. ശബരിമലയുടെ ആത്മീയ ടൂറിസം സാധ്യതകളെക്കുറിച്ചുള്ള വിഷയങ്ങൾ കെ. ബിജു ഐ.എ.എസ്., വേണു രാജാമണി, പി.എസ്. പ്രശാന്ത് എന്നിവർ അവതരിപ്പിക്കുമെന്നും അധികൃതർ അറിയിച്ചു.
