വാഷിംഗ്ടൺ: കഴിഞ്ഞയാഴ്ച നടന്ന ചാർളി കിർക്കിന്റെ കൊലപാതകത്തെക്കുറിച്ച് സോഷ്യൽ മീഡിയയിൽ മോശമായി അഭിപ്രായം രേഖപ്പെടുത്തിയ ജീവനക്കാരെ ഡെൽറ്റ എയർ ലൈൻസ്, അമേരിക്കൻ എയർലൈൻസ്, യുണൈറ്റഡ് എയർലൈൻസ് എന്നീ വിമാനക്കമ്പനികൾ സസ്പെൻഡ് ചെയ്തു.
സംഭവം ശ്രദ്ധയിൽപ്പെട്ടതിനെ തുടർന്ന് ഡെൽറ്റ എയർ ലൈൻസ് സി.ഇ.ഒ. എഡ് ബാസ്റ്റ്യൻ ആഭ്യന്തര മെമ്മോയിലൂടെ പ്രതികരിച്ചു. “ചാൾസ് കിർക്കിന്റെ കൊലപാതകത്തെക്കുറിച്ച് ചില ജീവനക്കാർ സോഷ്യൽ മീഡിയയിൽ നടത്തിയ പരാമർശങ്ങൾ ആരോഗ്യകരവും മാന്യവുമായ സംവാദത്തിന്റെ അതിരുകൾ ലംഘിച്ചു,” അദ്ദേഹം സി.എൻ.എന്നുമായി പങ്കുവെച്ച മെമ്മോയിൽ പറഞ്ഞു.
“ഈ പോസ്റ്റുകൾ ഞങ്ങളുടെ മൂല്യങ്ങൾക്കും സോഷ്യൽ മീഡിയ നയങ്ങൾക്കും വിരുദ്ധമാണ്. ഈ ജീവനക്കാരെ അന്വേഷണത്തിന്റെ ഭാഗമായി സസ്പെൻഡ് ചെയ്തിരിക്കുന്നു,” ബാസ്റ്റ്യൻ മെമ്മോയിൽ വ്യക്തമാക്കി.
അമേരിക്കൻ എയർലൈൻസും സമാനമായ പ്രസ്താവന പുറത്തിറക്കി. “ഇത്തരം അക്രമങ്ങളെ പ്രോത്സാഹിപ്പിക്കുന്ന പോസ്റ്റുകൾ സോഷ്യൽ മീഡിയയിൽ ഇട്ട ചില ജീവനക്കാരെ ഉടൻ തന്നെ ജോലിയിൽ നിന്ന് നീക്കം ചെയ്തിട്ടുണ്ട്,” അമേരിക്കൻ എയർലൈൻസ് അറിയിച്ചു.
യുണൈറ്റഡ് എയർലൈൻസും തങ്ങളുടെ ജീവനക്കാർക്കെതിരെ നടപടിയെടുത്തതായി റിപ്പോർട്ടുകളുണ്ട്. ഈ വിഷയത്തിൽ കൂടുതൽ അന്വേഷണങ്ങൾ നടന്നുവരികയാണ്.
