ചൈനീസ് നടനും ഗായകനും മ്യൂസിക് വീഡിയോ സംവിധായകനുമായ അലൻ യു മെങ്‌ലോംഗ് (37) കെട്ടിടത്തിൽ നിന്ന് വീണ് മരിച്ചു. വ്യാഴാഴ്ചയാണ് സംഭവം നടന്നത്. അലന്റെ മരണം അദ്ദേഹത്തിന്റെ മാനേജ്മെന്റ് ടീം വെയ്ബോയിലൂടെ പുറത്തിറക്കിയ പ്രസ്താവനയിലാണ് സ്ഥിരീകരിച്ചത്. സംഭവത്തിൽ ദുരൂഹതയില്ലെന്ന് പോലീസ് വ്യക്തമാക്കി.
അലന്റെ അപ്രതീക്ഷിത വിയോഗം ആരാധകരെയും സഹപ്രവർത്തകരെയും ഞെട്ടിച്ചിരിക്കുകയാണ്. ബഹുമുഖ പ്രതിഭയുടെ നഷ്ടത്തിൽ സിനിമാ ലോകം മുഴുവനും ദുഃഖം രേഖപ്പെടുത്തി.
2007-ൽ നടന്ന ‘മൈ ഷോ, മൈ സ്റ്റൈൽ’ എന്ന ടാലന്റ് റിയാലിറ്റി ഷോയിലൂടെയാണ് യു മെങ്‌ലോംഗ് തന്റെ കരിയർ ആരംഭിച്ചത്. തുടർന്ന് 2011-ൽ ‘ദി ലിറ്റിൽ പ്രിൻസ്’ എന്ന ഹ്രസ്വചിത്രത്തിലൂടെ അഭിനയരംഗത്തേക്ക് കടന്നു.
‘ഗോ പ്രിൻസസ് ഗോ’, ‘ലവ് ഗെയിം ഇൻ ഈസ്റ്റേൺ ഫാന്റസി’, ‘ഫ്യൂഡ്’, ‘എറ്റേണൽ ലവ്’ തുടങ്ങിയ നിരവധി ചൈനീസ് ടെലിവിഷൻ പരമ്പരകളിൽ അദ്ദേഹം ശ്രദ്ധേയമായ വേഷങ്ങൾ അവതരിപ്പിച്ചു. നിരവധി സംഗീത വീഡിയോകളും അദ്ദേഹം പുറത്തിറക്കിയിട്ടുണ്ട്.
‘ദി മൂൺ ബ്രൈറ്റൻസ് ഫോർ യു’ എന്ന ചിത്രത്തിലെ ‘ലിൻ ഫാങ്’ എന്ന കഥാപാത്രത്തിലൂടെയാണ് അലൻ ഏറെ ആരാധകരെ സ്വന്തമാക്കിയത്. അഭിനയത്തിന് പുറമെ, മ്യൂസിക് വീഡിയോ സംവിധായകനായും അലൻ പ്രവർത്തിച്ചു.
Chinese Actor and Singer Alan Yu Menglong (37) Dies After Falling from Building
