യുക്മ കേരളപ്പൂരം വള്ളംകളിക്ക് ഫൊക്കാന പ്രസിഡന്റ് സജിമോൻ ആന്റണി വിശിഷ്ടാതിഥിയായി

ശ്രീകുമാർ ഉണ്ണിത്താൻ

ലണ്ടൻ: ഇംഗ്ലണ്ടിലെ മലയാളി അസോസിയേഷനുകളുടെ കേന്ദ്ര സംഘടനയായ യുക്മയുടെ ഏഴാമത് കേരള പൂരവും ഓണാഘോഷവും വള്ളംകളിയും വളരെ പ്രൗഢഗംഭീരമായി നടന്നു. ഫൊക്കാന പ്രസിഡന്റ് സജിമോൻ ആന്റണി ചീഫ് ഗസ്റ്റ് ആയി പങ്കെടുത്ത പരിപാടി കേരളത്തനിമ നിറഞ്ഞതായിരുന്നു.

കേരളത്തിനു പുറത്ത് സംഘടിപ്പിക്കുന്ന മലയാളികളുടെ ഏറ്റവും വലിയ വള്ളംകളി മത്സരമാണിത്. കേരളപ്പൂരം വള്ളംകളിക്ക് ഇക്കുറി ആവേശപൂർവ്വമായ വരവേൽപ്പാണ് യുകെ മലയാളികൾ ഒരുക്കിയത്. ഒൻപതര മണിയോടെ ആരംഭിച്ച മത്സരങ്ങൾക്ക് വൈകുന്നേരം ആറര മണിയോടെയാണ് സമാപനമായത്. 32 പുരുഷന്മാരുടെ ടീമും 16 സ്ത്രീകളുടെ ടീമും പങ്കെടുത്തു. ഏകദേശം പതിനായിരത്തോളം കാണികൾ ഒഴുകിയെത്തി.

യുക്മ ദേശീയ അദ്ധ്യക്ഷൻ അഡ്വ. എബി സെബാസ്റ്റ്യൻ അദ്ധ്യക്ഷത വഹിച്ച സമാപന സമ്മേളനം ബേസിങ്‌സ്റ്റോക്ക് കൗൺസിലർ സജീഷ് ടോം ഔദ്യോഗികമായി ഉദ്‌ഘാടനം ചെയ്തു. ഫൊക്കാന പ്രസിഡന്റ് സജിമോൻ ആന്റണി വിശിഷ്ടാതിഥിയായി പങ്കെടുത്തു. സെക്രട്ടറി ജയകുമാർ നായർ ചടങ്ങിൽ സ്വാഗതം ആശംസിച്ചു. യുകെ പാർലമെന്റിലെ ഏക മലയാളി എം.പി.യായ സോജൻ ജോസഫ് ജലമേളയ്ക്ക് ഫ്ലാഗ് ഓഫ് ചെയ്തു. ഒരു വശത്ത് വാശിയേറിയ മത്സരത്തോട് വള്ളംകളി നടക്കുമ്പോൾ മറ്റു സ്റ്റേജുകളിൽ കേരളപ്പൂരത്തിന്റെ ഭാഗമായി നടന്ന യുക്മ തെരേസാസ് ഓണച്ചന്തം പരിപാടിയും അതോടൊപ്പം തന്നെ കേരളത്തിലെ തനതായ നാടൻ കലാരൂപങ്ങളും അരങ്ങു തകർക്കുകയായിരുന്നു. മലയാളി സുന്ദരി വിജയികൾക്ക് സെലിബ്രിറ്റി ഗെസ്റ്റായ പ്രശസ്ത ചലച്ചിത്ര താരം നേഹ സക്സേന പുരസ്കാരങ്ങൾ സമ്മാനിച്ചു.

ഫൊക്കാന പ്രസിഡന്റ് സജിമോൻ ആന്റണി തന്റെ പ്രസംഗത്തിൽ ഫൊക്കാനയുടെ ആശംസകൾ നേരുകയും, യുക്മയുമായി സഹകരിച്ചു പ്രവർത്തിക്കേണ്ടതിന്റെ ആവശ്യം എടുത്തു പറയുകയും ചെയ്തു. അഡ്വ. എബി സെബാസ്റ്റ്യൻ, ജയകുമാർ നായർ, ഷിജോ വർഗീസ് തുടങ്ങിയവരുടെ നേതൃത്വത്തിൽ യുക്മ നടത്തുന്ന പ്രവർത്തനങ്ങൾ പ്രശംസനീയം ആണെന്നും സജിമോൻ ആന്റണി അഭിപ്രായപ്പെട്ടു. ഫൊക്കാന മെഡിക്കൽ കാർഡും പ്രിവിലേജ് കാർഡും ഓണസമ്മാനമായി യുക്മയുമായി സഹകരിച്ച് യുകെ മലയാളികൾക്കും പ്രയോജനം ലഭിക്കത്തക്ക രീതിയിൽ വ്യാപിപ്പിക്കുവാനും ഫൊക്കാനക്ക് സന്തോഷമേ ഉള്ളൂ എന്ന് അദ്ദേഹം അറിയിച്ചു.

ലോകത്തിലുള്ള മലയാളി സംഘടനകളെ ഒരേ കുടക്കീഴിൽ കൊണ്ടുവരുക എന്നത് ഫൊക്കാനയുടെ ഒരു വിഷൻ കൂടിയാണെന്ന് സജിമോൻ ആന്റണി അഭിപ്രായപ്പെട്ടു. കേരളത്തിൽനിന്നും മലയാളികൾ ലോകമെമ്പാടും വസിക്കുമ്പോഴും അവരെ ഒന്നിപ്പിക്കുകയും പൊതുവായ കാര്യങ്ങളിൽ സഹകരിച്ച് പ്രവർത്തിക്കുകയും ചെയ്യുക എന്നത് ഫൊക്കാനയുടെ പ്രഖ്യാപിത ലക്ഷ്യമാണ്. ലോകത്തിലുള്ള മലയാളി സംഘടനകളെ ഒരു കുടക്കീഴിൽ എത്തിക്കുകയും ലോകമെമ്പാടുമുള്ള മലയാളികളുടെ ഏകീകരണവുമാണ് ഫൊക്കാന ഇതിലൂടെ ലക്ഷ്യം വെക്കുന്നതെന്ന് പ്രസിഡന്റ് സജിമോൻ ആന്റണി അറിയിച്ചു.

Fokana President Sajimon Antony was the special guest at the ukma Onam Boat Race