ശബരിമലയിൽ ആചാരലംഘനം നടത്തിയതിന് മുഖ്യമന്ത്രി പിണറായി വിജയൻ വിശ്വാസികളോട് മാപ്പ് പറയണമെന്ന് മുൻ പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. ശബരിമലയിൽ സർക്കാർ നടത്തുന്ന ആഗോള അയ്യപ്പ സംഗമം തിരഞ്ഞെടുപ്പിനെ മുന്നിൽക്കണ്ടുള്ള രാഷ്ട്രീയ നാടകമാണെന്നും അദ്ദേഹം ആരോപിച്ചു. ഉമ്മൻചാണ്ടി സർക്കാർ നൽകിയ സത്യവാങ്മൂലം തിരുത്തിയാണ് പിണറായി സർക്കാർ യുവതി പ്രവേശനത്തിന് വഴിയൊരുക്കിയതെന്ന് ചെന്നിത്തല പറഞ്ഞു. ഇതിലൂടെ മുഖ്യമന്ത്രി വിശ്വാസികളുടെ വികാരങ്ങളെ വ്രണപ്പെടുത്തുകയും ശബരിമലയെ കലാപഭൂമിയാക്കുകയും ചെയ്തുവെന്ന് അദ്ദേഹം കുറ്റപ്പെടുത്തി.
ശബരിമലയിൽ ഭക്തരെ പ്രിവിലേജ്ഡ് ക്ലാസ്സായി തരംതിരിക്കാനുള്ള നീക്കം അംഗീകരിക്കാനാവില്ലെന്നും ചെന്നിത്തല വ്യക്തമാക്കി. ജാതിമതഭേദമന്യേ എല്ലാവരും അയ്യപ്പന്റെ സന്നിധിയിൽ തുല്യരാണെന്നും, ശബരിമലയുടെ പ്രത്യേകത ഇതാണെന്നും അദ്ദേഹം ചൂണ്ടിക്കാട്ടി. ആയിരക്കണക്കിന് ഭക്തർക്കെതിരെ നാമജപ ഘോഷയാത്ര നടത്തിയതിന്റെ പേരിൽ എടുത്ത കേസുകൾ പിൻവലിക്കാൻ സർക്കാർ തയ്യാറുണ്ടോയെന്നും, തിരുത്തിയ സത്യവാങ്മൂലം പിൻവലിക്കുമോയെന്നും മുഖ്യമന്ത്രി വ്യക്തമാക്കണമെന്ന് ചെന്നിത്തല ആവശ്യപ്പെട്ടു.
