കൊച്ചി: ശബരിമല ശ്രീകോവിലിന് മുന്നിലെ ദ്വാരപാലക ശിൽപ്പങ്ങളിൽ പൊതിഞ്ഞ സ്വർണ്ണപ്പാളികളുടെ ഭാരം കുറഞ്ഞതുമായി ബന്ധപ്പെട്ട കേസ് ഹൈക്കോടതി ഇന്ന് വീണ്ടും പരിഗണിക്കും. സ്വർണ്ണപ്പാളികൾ ഇളക്കിമാറ്റിയതിൽ ദേവസ്വം ബോർഡിനെതിരെ രൂക്ഷ വിമർശനം ഉയർന്നിരുന്നു. സ്വർണ്ണപ്പാളികളുടെ ഭാരം നാല് കിലോയോളം കുറഞ്ഞതായി കണ്ടെത്തിയതിനെത്തുടർന്ന്, ഇത് ഉൾപ്പെടെയുള്ള വിഷയങ്ങളിൽ തിരുവിതാംകൂർ ദേവസ്വം ബോർഡിന്റെ വിശദീകരണം ഇന്ന് കോടതിയിൽ സമർപ്പിക്കും.
ദ്വാരപാലക ശിൽപ്പങ്ങൾ പൊതിഞ്ഞ സ്വർണ്ണപ്പാളികൾ ഇളക്കി മാറ്റി പുതിയ സ്വർണ്ണം പൂശുന്നതിനായി ചെന്നൈയിലേക്ക് കൊണ്ടുപോയിരുന്നു. ഇതിനുശേഷം നടത്തിയ പരിശോധനയിൽ പഴയ പാളികളുടെ ഭാരത്തിൽ നാല് കിലോയോളം കുറവ് വന്നതായി കണ്ടെത്തിയതാണ് കേസിന് ആധാരം.
സ്വർണ്ണം പൂശുന്ന രാസപ്രക്രിയയായ ഇലക്ട്രോപ്ലേറ്റിങ്ങിന് വേണ്ടിയാണ് പാളികൾ ചെന്നൈയിലേക്ക് കൊണ്ടുപോയതെന്നും, ഈ പ്രക്രിയ സന്നിധാനത്ത് വെച്ച് നടത്താൻ കഴിയില്ലെന്നും ദേവസ്വം ബോർഡ് കോടതിയെ അറിയിക്കും. ഭാരം കുറഞ്ഞതിനെക്കുറിച്ചുള്ള സാങ്കേതികപരമായ വിശദീകരണവും ദേവസ്വം സമർപ്പിക്കും. കേസിൽ നിർണായകമായ മറ്റൊരു വിഷയമായ, കാണാതായ ദ്വാരപാലക പീഠങ്ങളിലൊന്ന് കണ്ടെത്തിയ വിവരവും ദേവസ്വം വിജിലൻസ് ഇന്ന് ഹൈക്കോടതിയെ അറിയിക്കും. സ്വർണ്ണം സ്പോൺസർ ചെയ്ത വ്യക്തിയുടെ ബന്ധുവിൽ നിന്നാണ് ദ്വാരപാലക ശിൽപ്പങ്ങളുടെ പീഠം കണ്ടെത്തിയത്.
ഹൈക്കോടതിയുടെ മുൻകൂർ അനുമതിയില്ലാതെ സ്വർണ്ണപ്പാളികൾ ഇളക്കി മാറ്റിയത് അനുചിതമാണെന്ന് നേരത്തെ കോടതി നിരീക്ഷിച്ചിരുന്നു. കൂടാതെ, സ്വർണ്ണം പൂശലുമായി ബന്ധപ്പെട്ട എല്ലാ മുൻ രേഖകളും കോടതിയിൽ ഹാജരാക്കാൻ ദേവസ്വം ബോർഡിന് നിർദ്ദേശം നൽകിയിരുന്നു.
