തടസങ്ങൾ നീങ്ങും; ഇന്ത്യ-യുഎസ് വ്യാപാരക്കരാർ അന്തിമ ഘട്ടത്തിലെന്ന് പുതിയ യുഎസ് അംബാസഡർ സെർജിയോ ഗോർ

വാഷിംഗ്ടൺ: ഇന്ത്യയും അമേരിക്കയും തമ്മിലുള്ള നിർണായക വ്യാപാരക്കരാർ അന്തിമഘട്ടത്തിലാണെന്ന് ഇന്ത്യയിലേക്കുള്ള പുതിയ യുഎസ് അംബാസഡർ സെർജിയോ ഗോർ അറിയിച്ചു. ചർച്ചകൾ ഇപ്പോൾ ‘സൂക്ഷ്മമായ വിശദാംശങ്ങളിലേക്ക്’ കടന്നിരിക്കുകയാണെന്നും അദ്ദേഹം പറഞ്ഞു. പ്രസിഡന്റ് ഡൊണാൾഡ് ട്രംപിന്റെ അടുത്ത വിശ്വസ്തനായ ഗോർ, ഇന്ത്യയെ അമേരിക്കയുടെ ഒരു തന്ത്രപ്രധാന പങ്കാളി എന്ന് വിശേഷിപ്പിച്ചു. ഇരു രാജ്യങ്ങളും തമ്മിലുള്ള സുരക്ഷ, വ്യാപാരം, പൊതുവായ മൂല്യങ്ങൾ എന്നിവയിലെ സഹകരണം കൂടുതൽ ശക്തിപ്പെടുത്തുമെന്നും അദ്ദേഹം വ്യക്തമാക്കി. ഈ നീക്കം ഇന്ത്യാ-യുഎസ് ബന്ധത്തിലെ നിലവിലെ പ്രശ്നങ്ങൾക്ക് അയവ് വരുത്തുമെന്ന് സൂചിപ്പിക്കുന്നു.

‘ഇന്ത്യ കേവലം ഒരു പ്രാദേശിക സഖ്യകക്ഷി എന്നതിലുപരി ഒരു തന്ത്രപ്രധാന പങ്കാളിയാണ്,’ ഗോർ അഭിപ്രായപ്പെട്ടു. ഇരു രാജ്യങ്ങൾക്കുമിടയിൽ വിശ്വാസം വീണ്ടെടുക്കുക, നിലവിലുള്ള വ്യാപാര തർക്കങ്ങൾ പരിഹരിക്കുക, കാലാവസ്ഥ, പ്രതിരോധം, സാങ്കേതികവിദ്യ എന്നീ മേഖലകളിൽ സഹകരണം വികസിപ്പിക്കുക എന്നിവയാണ് തന്റെ പ്രധാന മുൻഗണനകളായി അദ്ദേഹം ചൂണ്ടിക്കാട്ടിയത്. പ്രസിഡന്റ് ട്രംപിനും പ്രധാനമന്ത്രി മോദിക്കും തമ്മിൽ ആഴത്തിലുള്ള വ്യക്തിപരമായ സൗഹൃദമുണ്ടെന്നും ഗോർ കൂട്ടിച്ചേർത്തു. മറ്റ് രാജ്യങ്ങളെയും അവിടുത്തെ നേതാക്കളെയും വിമർശിക്കുമ്പോൾ ട്രംപ് സാധാരണയായി നേരിട്ട് ആക്രമിക്കാറുണ്ടെങ്കിലും, ഇന്ത്യയെക്കുറിച്ച് പറയുമ്പോൾ മോദിയെ പ്രശംസിക്കാൻ അദ്ദേഹം പ്രത്യേക ശ്രദ്ധ നൽകാറുണ്ടെന്നും ഗോർ കൂട്ടിച്ചേർത്തു.

താരിഫ് നയങ്ങളും റഷ്യയുമായുള്ള ബന്ധവും

ട്രംപിന്റെ താരിഫ് നയങ്ങളെക്കുറിച്ചും ഗോർ പ്രതികരിച്ചു. ‘ഞങ്ങൾ സുഹൃത്തുക്കളെ വ്യത്യസ്ത മാനദണ്ഡങ്ങൾ ഉപയോഗിച്ചാണ് കാണുന്നത്. മറ്റ് രാജ്യങ്ങളെക്കാൾ ഇന്ത്യയിൽ നിന്ന് ഞങ്ങൾ കൂടുതൽ പ്രതീക്ഷിക്കുന്നു,’ എന്നായിരുന്നു എന്തുകൊണ്ടാണ് ഇന്ത്യക്ക് കടുത്ത താരിഫുകൾ നേരിടേണ്ടി വരുന്നതെന്ന ചോദ്യത്തിന് അദ്ദേഹത്തിന്റെ മറുപടി. ഇന്ത്യൻ ഉൽപ്പന്നങ്ങൾക്ക് 25 ശതമാനം പരസ്പര തീരുവയും റഷ്യയിൽ നിന്ന് എണ്ണ വാങ്ങുന്നതുമായി ബന്ധപ്പെട്ട് അധികമായി 25 ശതമാനം ലെവിയും ചേർത്ത് മൊത്തം 50 ശതമാനം താരിഫ് ട്രംപ് ഭരണകൂടം ചുമത്തിയിരുന്നു. ഇത് ലോകത്തിലെ ഏറ്റവും ഉയർന്ന നിരക്കുകളിലൊന്നാണ്. വിലകുറഞ്ഞ ക്രൂഡ് ഓയിൽ വാങ്ങുന്നതിലൂടെ ഇന്ത്യ ‘റഷ്യയുടെ മാരകമായ ആക്രമണങ്ങൾക്ക് ഇന്ധനം നൽകുന്നു’ എന്ന് ട്രംപ് ആരോപിച്ചിരുന്നു.

വ്യാപാരക്കരാറിന്റെ പുരോഗതി

യുഎസുമായുള്ള വ്യാപാരക്കരാറിന്റെ ആദ്യ ഘട്ടം 2025 നവംബറോടെ പൂർത്തിയാക്കാൻ കഴിയുമെന്ന് വാണിജ്യ മന്ത്രി പീയൂഷ് ഗോയൽ നേരത്തെ സൂചിപ്പിച്ചിരുന്നു. 2025 ഫെബ്രുവരിയിൽ പ്രധാനമന്ത്രി നരേന്ദ്ര മോദിയും അന്നത്തെ പ്രസിഡന്റ് ട്രംപും ചേർന്ന് ഇരു രാജ്യങ്ങളിലെയും മന്ത്രിമാർ ഒരു നല്ല കരാർ എത്രയും പെട്ടെന്ന് ഉണ്ടാക്കണമെന്ന് നിർദ്ദേശം നൽകിയിരുന്നു. നിലവിലുള്ള വെല്ലുവിളികൾക്കിടയിലും, ഇരു രാജ്യങ്ങളും തമ്മിലുള്ള വ്യാപാര തർക്കങ്ങൾ പരിഹരിച്ച് തന്ത്രപരമായ പങ്കാളിത്തം കൂടുതൽ ശക്തിപ്പെടുത്താനുള്ള നിരന്തര ശ്രമങ്ങളാണ് ഈ സംഭവവികാസങ്ങൾ എടുത്തു കാണിക്കുന്നത്.

സെർജിയോ ഗോറിന്റെ നിയമനം

ട്രംപിന്റെ അടുത്ത സുഹൃത്തും വൈറ്റ് ഹൗസ് പേഴ്‌സണൽ ഡയറക്ടറുമായ സെർജിയോ ഗോറിനെ ഇന്ത്യയിലേക്കുള്ള അമേരിക്കൻ അംബാസഡറായി നിയമിച്ചതിന് പിന്നിൽ പല ചർച്ചകളും നടന്നിരുന്നു. ദക്ഷിണമധ്യേഷ്യൻ മേഖലയിലേക്കുള്ള യുഎസ് പ്രസിഡന്റിന്റെ പ്രത്യേക ദൂതനായും ഗോർ പ്രവർത്തിക്കും. ഗോർ തന്റെ ‘പ്രിയ സുഹൃത്തും’ ഭരണത്തിലെ ഏറ്റവും സ്വാധീനമുള്ള വ്യക്തികളിൽ ഒരാളുമാണെന്ന് ട്രംപ് വിശേഷിപ്പിച്ചിരുന്നു. റഷ്യയുമായുള്ള വ്യാപാര ബന്ധത്തിന്റെ പേരിൽ ഇന്ത്യക്ക് മേൽ 25 ശതമാനം അധിക നികുതി ചുമത്തിയതിനൊപ്പം, 25 ശതമാനം പ്രതികാര തീരുവയും ട്രംപ് ഏർപ്പെടുത്തിയ സാഹചര്യത്തിൽ ഗോറിന്റെ നിയമനം നിർണായകമാണെന്നും വിലയിരുത്തലുകൾ ഉണ്ടായിരുന്നു. നിലവിൽ വൈറ്റ് ഹൗസ് പ്രസിഡൻഷ്യൽ പേഴ്‌സണൽ ഓഫീസിന്റെ ഡയറക്ടറായി സേവനമനുഷ്ഠിക്കുന്ന ഗോർ, സ്ഥാനപതിയായി ചുമതലയെടുക്കുന്നതുവരെ പദവിയിൽ തുടരുമെന്ന് ട്രംപ് പറഞ്ഞിരുന്നു. ഇന്ത്യയിലേക്ക് വരുന്നതിന് മുമ്പ് അമേരിക്കൻ വിദേശകാര്യ സമിതിയുടെ മുന്നിൽ ഗോർ ഹാജരായി. അവർക്ക് മുന്നിലാണ് ഗോർ ഇന്ത്യയിലേക്കുള്ള തന്റെ വരവിന്റെ ലക്ഷ്യം പ്രഖ്യാപിച്ചത്.

പഴയ സോവിയറ്റ് യൂണിയന്റെ ഭാഗമായിരുന്ന ഉസ്‌ബെക്കിസ്ഥാനിലെ താഷ്‌കന്റിൽ 1986 നവംബർ 30നാണ് സെർജിയോ ഗൊറോഖോവ്‌സ്‌കി എന്ന സെർജിയോ ഗോർ ജനിച്ചത്. പഠനം യുഎസിലെ ജോർജ് വാഷിങ്ടൺ സർവകലാശാലയിൽ ആയിരുന്നു. അക്കാലംതൊട്ടേ രാഷ്ട്രീയത്തിൽ സജീവമായി. മിഷേൽ ബാച്ച്മാൻ, സ്റ്റീവ് കിങ്, റാൻഡി ഫോർബ്സ് തുടങ്ങിയ റിപ്പബ്ലിക്കൻ പാർട്ടി നേതാക്കളുടെ വക്താവായി പ്രവർത്തിച്ചാണ് ഗോർ രാഷ്ട്രീയ ജീവിതം ആരംഭിച്ചത്. 2013-ൽ സെനറ്റർ റാൻഡ് പോളിന്റെ രാഷ്ട്രീയകാര്യ സമിതിയായ റാൻഡ്പാകിന്റെ കമ്മ്യൂണിക്കേഷൻസ് ഡയറക്ടറായി. വിന്നിങ് ടീം പബ്ലിഷിങ് എന്ന പ്രസാധക സ്ഥാപനത്തിന്റെ സഹസ്ഥാപകനാണ്. ‘ലെറ്റേഴ്സ് ടു ട്രംപ്’, ‘ഔർ ജേർണി ടുഗെദർ’, ‘സേവ് അമേരിക്ക’ തുടങ്ങിയ ട്രംപുമായി ബന്ധപ്പെട്ട ഒട്ടേറെ പുസ്തകങ്ങൾ ഈ സ്ഥാപനം പുറത്തിറക്കിയിട്ടുണ്ട്. 2024 നവംബറിൽ, ട്രംപ് ഗോറിനെ വൈറ്റ് ഹൗസ് പ്രസിഡൻഷ്യൽ പേഴ്‌സണൽ ഓഫീസിന്റെ ഡയറക്ടറായി നിയമിച്ചിരുന്നു.

India-US trade deal in final stages: New US Ambassador Sergio Gor