ഡൽഹിയിലെയും മുംബൈയിലെയും ഭീകരാക്രമണങ്ങളുടെ മുഖ്യസൂത്രധാരൻ ജെയ്ഷെ മുഹമ്മദ് തലവൻ മസൂദ് അസറാണെന്ന് സംഘടനയുടെ മുതിർന്ന കമാൻഡർ മസൂദ് ഇല്യാസ് കശ്മീരി വെളിപ്പെടുത്തി. പാകിസ്താൻ ഈ ആക്രമണങ്ങളിലെ പങ്ക് ആവർത്തിച്ച് നിഷേധിക്കുന്നതിനിടെയാണ് ഈ വെളിപ്പെടുത്തൽ. ഇന്ത്യയിൽ അഞ്ച് വർഷം തടവിൽ കഴിഞ്ഞ ശേഷം മോചിതനായ മസൂദ് അസർ, പാകിസ്താനിലെ ബലാക്കോട്ടിൽ താവളമുറപ്പിച്ച് ഇന്ത്യയ്ക്കെതിരായ ആക്രമണങ്ങൾ ആസൂത്രണം ചെയ്തതായി കശ്മീരി വീഡിയോയിൽ വ്യക്തമാക്കുന്നു. 2019 ലെ ഇന്ത്യയുടെ ബലാക്കോട്ട് വ്യോമാക്രമണവും ഈ കേന്ദ്രത്തെ ലക്ഷ്യമിട്ടായിരുന്നു.
തിഹാർ ജയിലിൽ നിന്ന് മോചിതനായ മസൂദ് അസർ, ബലാക്കോട്ടിൽ ജെയ്ഷെ മുഹമ്മദിന്റെ പ്രവർത്തനങ്ങൾക്ക് നേതൃത്വം നൽകി. ഡൽഹിയിലും മുംബൈയിലും നടത്തിയ ആക്രമണങ്ങളിലൂടെ ഇന്ത്യയെ ഭീതിയിലാഴ്ത്തിയെന്ന് മസൂദ് ഇല്യാസ് വീഡിയോയിൽ അവകാശപ്പെടുന്നു. ഒസാമ ബിൻ ലാദനെ ‘രക്തസാക്ഷി’ എന്ന് വിശേഷിപ്പിച്ച അദ്ദേഹം, മസൂദ് അസറിന്റെ ആശയങ്ങളും പ്രവർത്തനങ്ങളും പ്രശംസിക്കുകയും ചെയ്തു. പാകിസ്താന്റെ സൈനിക-സുരക്ഷാ സ്ഥാപനങ്ങളുടെ മേൽനോട്ടത്തിൽ ജെയ്ഷെ ക്യാമ്പുകൾ സ്വതന്ത്രമായി പ്രവർത്തിച്ചുവെന്ന ഇന്ത്യയുടെ ദീർഘകാല വാദത്തെ ഈ വെളിപ്പെടുത്തൽ ശരിവെക്കുന്നു.
ജെയ്ഷെ മുഹമ്മദിന്റെ ബഹവൽപൂരിലെ ആസ്ഥാനമായ ജാമിഅ മസ്ജിദ് സുബ്ഹാൻ അള്ളായിൽ മേയ് ഏഴിന് നടന്ന ആക്രമണം കനത്ത നാശനഷ്ടങ്ങൾ വരുത്തിയതായും മസൂദ് അസറിന്റെ കുടുംബാംഗങ്ങൾ കൊല്ലപ്പെട്ടതായും റിപ്പോർട്ടുകൾ സൂചിപ്പിക്കുന്നു. പാകിസ്താന്റെ അതിർത്തിക്കുള്ളിൽ ഭീകര ക്യാമ്പുകൾ ഇല്ലെന്ന വാദത്തിന് എതിരായി, ഈ വെളിപ്പെടുത്തലുകൾ പാകിസ്താന്റെ നിലപാടിനെ കൂടുതൽ ചോദ്യം ചെയ്യുന്നു.
