കോഴിക്കോട്: കല, സാഹിത്യം, സംസ്കാരം എന്നീ മേഖലകളിലെ സമഗ്രസംഭാവനകൾ പരിഗണിച്ച് കേസരി ഭവനിൽ നടക്കുന്ന നവരാത്രി സർഗോത്സവത്തോടനുബന്ധിച്ചുള്ള സർഗപ്രതിഭാ പുരസ്കാരം ചലച്ചിത്ര പിന്നണി ഗായകൻ മധു ബാലകൃഷ്ണന്. 25,000 രൂപയും ശിൽപ്പവും അടങ്ങുന്നതാണ് പുരസ്കാരം. നവരാത്രി സർഗോത്സവത്തിന്റെ ഭാഗമായി കോഴിക്കോട് കേസരി ഭവനിൽ സെപ്റ്റംബർ 29-ന് വൈകിട്ട് 5.30ന് നടക്കുന്ന സാംസ്കാരിക സമ്മേളനത്തിൽ ഗവർണർ രാജേന്ദ്ര വിശ്വനാഥ ആർലേക്കർ പുരസ്കാരം സമ്മാനിക്കും.
പത്മശ്രീ കൈതപ്രം ദാമോദരൻ നമ്പൂതിരി, യു.കെ. കുമാരൻ, കാവാലം ശശികുമാർ, ഡോ. ശ്രീശൈലം ഉണ്ണിക്കൃഷ്ണൻ എന്നിവരടങ്ങിയ സമിതിയാണ് പുരസ്കാര ജേതാവിനെ തിരഞ്ഞെടുത്തത്.
1974 ജൂൺ 24-ന് തൃപ്പൂണിത്തുറയിലാണ് മധു ബാലകൃഷ്ണൻ ജനിച്ചത്. സംഗീതവുമായി അടുത്ത ബന്ധമുള്ള കുടുംബമായിരുന്നു അദ്ദേഹത്തിന്റേത്. അമ്മ ലീലാമ്മയ്ക്ക് സംഗീതത്തിലും നൃത്തത്തിലും ഔദ്യോഗിക പരിശീലനം ലഭിച്ചിട്ടുണ്ട്. ഇതാണ് മധുവിൻ്റെ സംഗീത ജീവിതത്തിന് പ്രചോദനമായത്. കൊരട്ടിയിലെ മാർ അഗസ്റ്റിൻ മെമ്മോറിയൽ ഹയർ സെക്കൻഡറി സ്കൂളിലായിരുന്നു അദ്ദേഹത്തിൻ്റെ പ്രാഥമിക വിദ്യാഭ്യാസം. അക്കാലത്ത് സ്കൂൾ കലോത്സവങ്ങളിൽ പങ്കെടുത്ത് നിരവധി പുരസ്കാരങ്ങൾ നേടിയിട്ടുണ്ട്.
ചലച്ചിത്ര മേഖലയിലെ അദ്ദേഹത്തിൻ്റെ ആദ്യ ഗാനം ഇതുവരെ റിലീസ് ചെയ്യാത്ത ‘ശിശിരം’ എന്ന സിനിമയിലേതായിരുന്നു. 1995-ൽ മദ്രാസിലെ ഇന്ത്യൻ ഫൈൻ ആർട്‌സ് സൊസൈറ്റിയിൽ പഠിച്ചുകൊണ്ടിരിക്കുമ്പോൾ, പ്രശസ്ത സംഗീത സംവിധായകൻ ഷായുടെ സംഗീതത്തിൽ ഗായിക കെ.എസ്. ചിത്രയോടൊപ്പം ‘ഉള്ളത്തെ തുറന്ന്’ എന്ന തമിഴ് ഗാനം ആലപിച്ചത് അദ്ദേഹത്തിൻ്റെ സംഗീത ജീവിതത്തിലെ ഒരു വഴിത്തിരിവായി. 2002-ൽ ‘വാൽക്കണ്ണാടി’ എന്ന മലയാള ചിത്രത്തിലെ ‘അമ്മേ അമ്മേ’ എന്ന ഗാനത്തിന് അദ്ദേഹത്തിന് മികച്ച ഗായകനുള്ള കേരള സംസ്ഥാന ചലച്ചിത്ര അവാർഡ് ലഭിച്ചു. മലയാളം, തമിഴ്, കന്നഡ, തെലുങ്ക് ഭാഷകളിൽ അദ്ദേഹം പാടിയിട്ടുണ്ട്.
ഭാര്യ ദിവ്യ, ക്രിക്കറ്റ് താരം ശ്രീശാന്തിന്റെ സഹോദരിയാണ്. മാധവ്, മഹാദേവ് എന്നിവരാണ് മക്കൾ.
Navratri Sargapratibha Award goes to film playback singer Madhu Balakrishnan
