ദില്ലി : നാളെ മുതൽ രാജ്യം പുതിയ ജിഎസ്ടി നിരക്കിലേക്ക് മാറുന്നു. ജിഎസ്ടി കൗൺസിലിന്റെ പുതിയ പരിഷ്കാരങ്ങൾ സെപ്റ്റംബർ 22 മുതൽ പ്രാബല്യത്തിൽ വരികയാണ്. നിത്യോപയോഗ സാധനങ്ങൾ ഉൾപ്പെടെയുള്ള നിരവധി ഉത്പന്നങ്ങൾക്ക് വില കുറയും. അതേസമയം ചില ആഡംബര വസ്തുക്കൾക്ക് വില വർധിക്കും. പുതിയ മാറ്റമനുസരിച്ച്, നിലവിലുണ്ടായിരുന്ന 5, 12, 18, 28 ശതമാനം എന്നീ നാല് സ്ലാബുകൾക്ക് പകരം 5 ശതമാനം, 18 ശതമാനം, എന്നിങ്ങനെ 2 പ്രധാന സ്ലാബുകളാണ് ഉണ്ടാകുക. സിഗരറ്റ്, പാൻമസാല അടക്കമുള്ളവയുടെയും ആഡംബര വസ്തുക്കളുടേയും നികുതി 40 ശതമാനമായി തുടരും. വിലക്കുറവ് സംബന്ധിച്ച് വൻകിട കമ്പനികൾ രാജ്യവ്യാപകമായി മുന്‍ കൂട്ടി പരസ്യം നൽകിയിട്ടുണ്ടെങ്കിലും പുതിയ സ്റ്റോക്കുകൾ എത്തിയാൽ മാത്രമേ ചെറുകിട വ്യാപാര രംഗത്ത് വിലക്കുറവ് പ്രതിഫലിക്കുകയുള്ളു.
നികുതി കുറയുന്നവ:
- സോപ്പ്, ഷാംപൂ, ടൂത്ത്പേസ്റ്റ്, വെളിച്ചെണ്ണ തുടങ്ങിയ നിത്യോപയോഗ സാധനങ്ങളുടെ വില കുറയും. ഇവയുടെ ജിഎസ്ടി 18 ശതമാനത്തിൽ നിന്ന് 5 ശതമാനമായി കുറച്ചു.
- ടിവി (32 ഇഞ്ചിന് മുകളിൽ), എസി, വാഷിംഗ് മെഷീൻ തുടങ്ങിയ ഗാർഹിക ഉപകരണങ്ങളുടെ നികുതി 28 ശതമാനത്തിൽ നിന്ന് 18 ശതമാനമായി കുറയും.
- ചെറിയ കാറുകൾ, 350 സിസി വരെയുള്ള ഇരുചക്രവാഹനങ്ങൾ എന്നിവയുടെ വിലയും കുറയും.
- സിമന്റ്, ട്രാക്ടറുകൾ, കാർഷിക ഉപകരണങ്ങൾ എന്നിവയുടെ ജിഎസ്ടി നിരക്കിലും കുറവുണ്ടാകും.
- ചില ജീവൻരക്ഷാ മരുന്നുകൾക്കും ആരോഗ്യ ഉത്പന്നങ്ങൾക്കും നികുതി കുറച്ചിട്ടുണ്ട്.
നികുതി കൂടുന്നവ:
- പുകയില ഉത്പന്നങ്ങൾ, മദ്യം, ഓൺലൈൻ ചൂതാട്ടം തുടങ്ങിയവക്ക് 40 ശതമാനം വരെ നികുതി വർധനവ് ഉണ്ടാകും. ഇത് ഈ ഉത്പന്നങ്ങളുടെ വില കൂട്ടും.
