കോട്ടയം: ശബരിമല വിഷയത്തിൽ സംസ്ഥാന സർക്കാരിന് അനുകൂലമായി നിലപാടെടുത്തതിനെ തുടർന്ന് വിമർശനങ്ങളും പ്രതിഷേധങ്ങളും നേരിടുന്ന പശ്ചാത്തലത്തിൽ പ്രതികരണവുമായി എൻ.എസ്.എസ്. ജനറൽ സെക്രട്ടറി ജി. സുകുമാരൻ നായർ. രാഷ്ട്രീയ നിലപാട് നേരത്തെ തന്നെ വ്യക്തമാക്കിയിട്ടുണ്ട് എന്നും, നിലപാടിൽ ഉറച്ചുനിൽക്കുന്നതായും അദ്ദേഹം കോട്ടയത്ത് മാധ്യമങ്ങളോട് പറഞ്ഞു.
കോട്ടയം ചങ്ങനാശ്ശേരിയിലെ പെരുന്നയിൽ എൻ.എസ്.എസ്. ആസ്ഥാനത്ത് പൊതുയോഗത്തിനായി എത്തിയപ്പോഴാണ് അദ്ദേഹം നിലപാട് ആവർത്തിച്ചത്.
“വളരെ വ്യക്തമായാണ് ഞാൻ എൻ്റെ രാഷ്ട്രീയ നിലപാട് നേരത്തെ തന്നെ പറഞ്ഞത്. പ്രതിഷേധിക്കുന്നവർ പ്രതിഷേധിച്ചോട്ടെ. ഏത് പ്രതിഷേധത്തേയും ഞങ്ങൾ നേരിട്ടുകൊള്ളാം.”
തനിക്കെതിരെ സ്ഥാപിച്ച വിമർശന ഫ്ളക്സുകളെക്കുറിച്ചുള്ള ചോദ്യത്തിന്, “ഫ്ളക്സുകൾ കണ്ടിരുന്നു. എനിക്ക് പബ്ലിസിറ്റി കിട്ടുമല്ലോ” എന്നായിരുന്നു അദ്ദേഹത്തിൻ്റെ മറുപടി.
ശബരിമല വിഷയത്തിൽ എൻ.എസ്.എസ്. എൽ.ഡി.എഫ്. സർക്കാരിനൊപ്പമാണെന്ന ജി. സുകുമാരൻ നായരുടെ പ്രസ്താവനയാണ് വലിയ വിവാദങ്ങൾക്ക് തിരികൊളുത്തിയത്.
അയ്യപ്പ സംഗമം ബഹിഷ്കരിച്ച കോൺഗ്രസിന് ഹിന്ദു വോട്ടുകൾ ആവശ്യമില്ലെന്നും, ശബരിമല ആചാരം സംരക്ഷിക്കുന്ന കാര്യത്തിൽ കേന്ദ്രത്തിലെ ബി.ജെ.പി. സർക്കാർ ഒന്നും ചെയ്യുന്നില്ലെന്നും അദ്ദേഹം ആരോപിച്ചിരുന്നു.
എൽ.ഡി.എഫ്. സർക്കാർ ആചാരം സംരക്ഷിക്കാൻ നടപടികൾ സ്വീകരിക്കുകയാണെന്നും, ആചാരങ്ങൾക്കെതിരെ ഒന്നും ചെയ്യില്ലെന്ന് ദേവസ്വം മന്ത്രി മുഖ്യമന്ത്രിയുടെ അറിവോടെ ഉറപ്പ് നൽകിയിട്ടുണ്ടെന്നും അദ്ദേഹം വ്യക്തമാക്കി.
വനിതാ പ്രവേശനവുമായി ബന്ധപ്പെട്ട് സർക്കാരിനോട് എതിർപ്പ് പ്രകടിപ്പിച്ചിരുന്ന ജനറൽ സെക്രട്ടറി നിലപാട് മാറ്റിയെന്ന വിമർശനമാണ് ഇതോടെ ഉയർന്നത്.
സംസ്ഥാനത്ത് പ്രതിഷേധം:
തുടർന്ന്, തിരുവനന്തപുരം, കോട്ടയം, പത്തനംതിട്ട തുടങ്ങിയ വിവിധയിടങ്ങളിൽ ജി. സുകുമാരൻ നായർക്കെതിരെ പ്രതിഷേധ പോസ്റ്ററുകൾ പ്രത്യക്ഷപ്പെട്ടിരുന്നു. “കുടുംബകാര്യത്തിനായി സമുദായത്തെ പിന്നിൽ നിന്ന് കുത്തിയ കട്ടപ്പ” എന്നാണ് ചില ഫ്ളക്സ് ബോർഡുകളിൽ അദ്ദേഹത്തെ വിമർശിച്ചിരുന്നത്.
