ആഗോള അയ്യപ്പ സംഗമത്തിലെ പങ്കാളിത്തവുമായി ബന്ധപ്പെട്ട വിവാദത്തിൽ മുഖ്യമന്ത്രി പിണറായി വിജയൻ പരോക്ഷമായി പ്രതികരിച്ചു. നോർക്ക ആരോഗ്യ ഇൻഷുറൻസ് ഉദ്ഘാടന വേദിയിൽ സംസാരിക്കവെ, ഒഴിഞ്ഞ കസേരകൾ കാണാത്തത് ചിലർക്ക് വിഷമം ഉണ്ടാക്കുമെന്ന് അദ്ദേഹം പറഞ്ഞു. നോർക്ക കെയറിന്റെ വിജയം സദസ്സിലെ നിറഞ്ഞ കസേരകളിൽ പ്രതിഫലിക്കുന്നുവെന്നും മുഖ്യമന്ത്രി കൂട്ടിച്ചേർത്തു.
അയ്യപ്പ സംഗമ വേദിയിൽ ആളുകൾ കുറവായിരുന്നത് വലിയ വിവാദമായിരുന്നു. 4245 പേർ രജിസ്റ്റർ ചെയ്ത പരിപാടിയിൽ ആയിരം പേർ പോലും എത്തിയില്ലെന്ന് മാധ്യമങ്ങൾ റിപ്പോർട്ട് ചെയ്തു. ഒഴിഞ്ഞ കസേരകളുടെ ചിത്രം എഐ ഉപയോഗിച്ച് നിർമിച്ചതാകാമെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദൻ പ്രതികരിച്ചിരുന്നു. 3000 പേർ പങ്കെടുക്കുമെന്ന് പ്രതീക്ഷിച്ച സംഗമത്തിൽ 4600 പേർ പങ്കെടുത്തെന്നും, മറിച്ചുള്ള പ്രചരണങ്ങൾ വ്യാജമാണെന്നും അദ്ദേഹം വ്യക്തമാക്കി.
