റഷ്യയുടെ ബയോണ്‍-എം നമ്ബർ 2 ബയോളജിക്കൽ സാറ്റലൈറ്റ് ദൗത്യം വിജയകരമായി പൂർത്തിയാക്കി. ബയോമെഡിക്കൽ പരീക്ഷണങ്ങൾക്കായി ബഹിരാകാശത്തേക്ക് അയച്ച 75 എലികളിൽ 65 എണ്ണം ജീവനോടെ ഭൂമിയിൽ തിരിച്ചെത്തി, എന്നാൽ 10 എലികൾ ദൗത്യത്തിനിടെ മരിച്ചതായി റഷ്യൻ അക്കാദമി ഓഫ് സയൻസസ് അധികൃതർ അറിയിച്ചു. ഓറണ്ബർഗിൽ തിരിച്ചിറങ്ങിയ പേടകത്തിന്റെ ലാൻഡിങ് സുഗമമായിരുന്നുവെന്നും അവർ വ്യക്തമാക്കി. ദൗത്യത്തിനിടെ ചില ആശങ്കകൾ ഉണ്ടായെങ്കിലും അവ സാധാരണ നിലയിൽ സംഭവിക്കാവുന്നവയാണെന്ന് സ്റ്റേറ്റ് സയന്റിഫിക് സെന്റർ-ഇൻസ്റ്റിറ്റ്യൂട്ട് ഓഫ് ബയോമെഡിക്കൽ പ്രോബ്ലംസ് (ഐബിഎംപി) ഡയറക്ടർ ഓർലോവ് അഭിപ്രായപ്പെട്ടു.
ഈ ദൗത്യം ജീവശാസ്ത്രപരമായ പ്രതിരോധശേഷി പരീക്ഷിക്കുന്നതിനാണ് രൂപകൽപ്പന ചെയ്തത്. എലികളെ വിവിധ ഗ്രൂപ്പുകളായി തിരിച്ചിരുന്നു, ചിലത് ജന്മനാ റേഡിയേഷനെ ചെറുക്കാൻ പ്രതിരോധശേഷിയുള്ളവയായിരുന്നു, മറ്റുള്ളവയ്ക്ക് റേഡിയേഷന്റെ ദോഷഫലങ്ങൾ തടയാൻ മരുന്നുകളും ചികിത്സയും നൽകി. ഭക്ഷണക്രമം അനുസരിച്ച് എലികളെ സബ് ഗ്രൂപ്പുകളായും തരംതിരിച്ചു. ദീർഘകാല ബഹിരാകാശ യാത്രകൾ സസ്തനികളുടെ ശരീരത്തെ എങ്ങനെ ബാധിക്കുന്നുവെന്നും, കോസ്മിക് വികിരണങ്ങളിൽ നിന്ന് ബഹിരാകാശ യാത്രികരെ എങ്ങനെ സംരക്ഷിക്കാമെന്നും പഠിക്കാൻ ഈ പരീക്ഷണങ്ങൾ സഹായിക്കുമെന്ന് വിദഗ്ധർ വിലയിരുത്തുന്നു.
10 എലികളുടെ മരണം ദൗത്യത്തിന്റെ വിജയത്തെ സാരമായി ബാധിച്ചിട്ടില്ലെന്നും, ഇത് സ്വീകാര്യമായ നഷ്ടമാണെന്നും ഓർലോവ് പറഞ്ഞു. പാരിസ്ഥിതികമോ സാങ്കേതികമോ ആയ കാരണങ്ങളേക്കാൾ, എലികൾ തമ്മിലുള്ള പരസ്പര ആക്രമണങ്ങളാണ് മരണത്തിന് കാരണമായതെന്നാണ് കരുതപ്പെടുന്നത്. മരിച്ച എലികളിൽ നിന്ന് ശേഖരിക്കുന്ന വിവരങ്ങളും ഗവേഷണത്തിന് ഉപകാരപ്രദമാകുമെന്ന് വിലയിരുത്തപ്പെടുന്നു.
ഈ ദൗത്യത്തിൽ നിന്നുള്ള വിശദമായ വിവരങ്ങൾ മോസ്കോയിലെ ലാബോറട്ടറികളിൽ കൂടുതൽ പഠനത്തിന് വിധേയമാക്കും. ബഹിരാകാശ യാത്രകളുടെ ശാരീരിക പ്രത്യാഘാതങ്ങൾ മനസ്സിലാക്കുന്നതിനും ഭാവിയിൽ ബഹിരാകാശ യാത്രികരുടെ സുരക്ഷ ഉറപ്പാക്കുന്നതിനും ഈ പഠനങ്ങൾ നിർണായകമാണ്. ഈ ദൗത്യം റഷ്യയുടെ ബയോമെഡിക്കൽ ഗവേഷണ രംഗത്തെ മുന്നേറ്റത്തിന്റെ ഭാഗമായി കണക്കാക്കപ്പെടുന്നു.
