വാഷിംഗ്ടൺ: അമേരിക്കൻ പ്രസിഡന്റ് ഡൊണാൾഡ് ട്രംപ് എച്ച്-1ബി വിസ അപേക്ഷകർക്ക് പുതിയ വാർഷിക ഫീസായി ഒരു ലക്ഷം ഡോളർ (ഏകദേശം 83.5 ലക്ഷം രൂപ) ഏർപ്പെടുത്തി. ട്രംപ് ഭരണകൂടം കുടിയേറ്റ നയങ്ങളിൽ കടുത്ത നടപടികൾ സ്വീകരിക്കുന്നതിന്റെ ഭാഗമായാണ് ഈ തീരുമാനം.
കമ്പനികൾക്ക് വിദഗ്ധരായ അമേരിക്കൻ പൗരന്മാരെ ലഭിക്കാൻ ബുദ്ധിമുട്ടുള്ള സാഹചര്യത്തിൽ, രാജ്യത്തേക്ക് മികച്ച വിദേശ തൊഴിലാളികളെ കൊണ്ടുവരുന്നതിനാണ് എച്ച്-1ബി വിസ പദ്ധതി ലക്ഷ്യമിടുന്നത്.
സാങ്കേതിക രംഗത്ത് വൈദഗ്ധ്യമുള്ള തൊഴിലാളികളുടെ കുറവ് നികത്താൻ വേണ്ടിയാണ് എച്ച്-1ബി വിസ പദ്ധതി നടപ്പാക്കിയത്. എന്നാൽ ഈ പദ്ധതി ഉപയോഗിച്ച് വിദേശത്ത് നിന്ന് കുറഞ്ഞ വേതനത്തിൽ തൊഴിലാളികളെ കൊണ്ടുവരുന്നു എന്ന ആരോപണം നിലനിന്നിരുന്നു. പുതിയ നയത്തിലൂടെ ഉയർന്ന വൈദഗ്ധ്യമുള്ള തൊഴിലാളികളെ മാത്രമേ കമ്പനികൾക്ക് നിയമിക്കാൻ സാധിക്കൂ എന്ന് ഉറപ്പാക്കുകയാണ് ലക്ഷ്യം. ഈ നീക്കത്തിൽ ടെക് വ്യവസായം സന്തുഷ്ടരായിരിക്കുമെന്നാണ് ട്രംപ് അറിയിച്ചത്.
