ന്യൂയോർക്ക്: ന്യൂയോർക്ക് മേയർ സ്ഥാനത്തേക്കുള്ള ഡെമോക്രാറ്റിക് സ്ഥാനാർത്ഥിയായ സോഹ്റാൻ മംദാനി, സെനറ്റർ ബെർണി സാൻഡേഴ്സുമായി ചേർന്ന് ശനിയാഴ്ച ബ്രൂക്ലിനിൽ ഒരു ടൗൺഹാളിൽ പങ്കെടുത്തു. പ്രസിഡന്‍റ് ഡോണൾഡ് ട്രംപിന്റെ ഇടപെടലിനെ മംദാനി നേരിട്ട് വിമർശിച്ചു. “ഇത് ഡോണൾഡ് ട്രംപോ, ബിൽ ആക്മാനോ, ഡോർഡാഷോ അല്ല. ഞങ്ങൾ ഞങ്ങളുടെ മേയറെ സ്വയം തെരഞ്ഞെടുക്കും,” ബ്രൂക്ലിൻ കോളേജിൽ തടിച്ചുകൂടിയ അനുയായികളോട് മംദാനി പറഞ്ഞു.
ജൂണിൽ നടന്ന പ്രൈമറിയിൽ മംദാനി വിജയിച്ചതിന് ശേഷം ന്യൂയോർക്ക് സിറ്റി ഡെമോക്രാറ്റുകൾക്കിടയിൽ നിലനിൽക്കുന്ന ഭിന്നതകൾക്കിടയിലാണ് സാൻഡേഴ്‌സിന്റെ “ഒളിഗാർക്കി വിരുദ്ധ പോരാട്ടം” എന്ന പരിപാടി നടന്നത്.
നോമിനേഷൻ മത്സരത്തിൽ മംദാനിയോട് പരാജയപ്പെട്ട മുൻ ന്യൂയോർക്ക് ഗവർണർ ആൻഡ്രൂ ക്യുമോ ഒരു സ്വതന്ത്ര സ്ഥാനാർത്ഥിയായി മത്സരിക്കുന്നുണ്ട്. നിലവിലെ മേയർ എറിക് ആഡംസും മറ്റൊരു പാർട്ടിയിൽ നിന്ന് വീണ്ടും തെരഞ്ഞെടുപ്പിനെ നേരിടാൻ തയ്യാറെടുക്കുകയാണ്.
