കൊച്ചി: ഭൂട്ടാനിൽ നിന്നും അനധികൃതമായി ആഡംബര വാഹനങ്ങൾ ഇറക്കുമതി ചെയ്തതുമായി ബന്ധപ്പെട്ട ‘ഓപ്പറേഷൻ നുംഖോർ’ അന്വേഷണത്തിന്റെ ഭാഗമായി കസ്റ്റംസ് പിടിച്ചെടുത്ത ലാൻഡ് റോവർ വാഹനം വിട്ടുകിട്ടണമെന്നാവശ്യപ്പെട്ട് നടൻ ദുൽഖർ സൽമാൻ നൽകിയ ഹർജി ഹൈക്കോടതി ഇന്ന് വീണ്ടും പരിഗണിക്കും.
ജസ്റ്റിസ് എ എ സിയാദ് റഹ്‌മാന്റെ ബെഞ്ച് കഴിഞ്ഞ തിങ്കളാഴ്ച ഹർജി പരിഗണിച്ചിരുന്നെങ്കിലും കസ്റ്റംസ് റിപ്പോർട്ട് നൽകാത്തതിനെ തുടർന്ന് ഇന്നത്തേക്ക് മാറ്റുകയായിരുന്നു. വിഷയത്തിൽ അടിയന്തരമായി റിപ്പോർട്ട് സമർപ്പിക്കാൻ കസ്റ്റംസിന് കോടതി നിർദേശം നൽകിയിരുന്നു.
പിടിച്ചെടുത്തത് 2004 മോഡൽ വാഹനമാണ്. ഈ വാഹനം ആദ്യമായി ഇന്ത്യയിലേക്ക് ഇറക്കുമതി ചെയ്തത് റെഡ് ക്രോസ് ആണെന്നാണ് ദുൽഖർ ഹർജിയിൽ പറയുന്നത്. തമിഴ്‌നാട് രജിസ്‌ട്രേഷനുള്ള ഈ വാഹനം ആർപി പ്രൊമോട്ടേഴ്‌സ് പ്രൈവറ്റ് ലിമിറ്റഡിൽ നിന്നാണ് വാങ്ങിയതെന്നും രേഖകൾ പ്രകാരം നിയമപരമായാണ് താൻ വാങ്ങിയതെന്നും അഞ്ചു വർഷമായി ഉപയോഗിക്കുന്നുണ്ടെന്നും ദുൽഖർ ചൂണ്ടിക്കാട്ടുന്നു. വാഹനം കസ്റ്റഡിയിലെടുത്തത് നിയമവിരുദ്ധമാണെന്നും മതിയായ രേഖകൾ പരിശോധിക്കാതെയാണ് കസ്റ്റംസ് നടപടിയെന്നും ഹർജിയിൽ ആരോപിക്കുന്നു. വാഹനം വിട്ടുകിട്ടുന്നതിനുള്ള നിയമപരമായ നടപടിക്രമങ്ങൾ സമയം എടുക്കുന്നതിനാൽ കസ്റ്റംസിന്റെ കസ്റ്റഡിയിൽ വാഹനം ശരിയായി സൂക്ഷിക്കാൻ സാധ്യതയില്ലെന്നും തകരാർ സംഭവിക്കാൻ സാധ്യതയുണ്ടെന്നും ദുൽഖർ സൽമാൻ ഹർജിയിൽ ആശങ്ക പ്രകടിപ്പിക്കുന്നുണ്ട്.
കസ്റ്റംസ് അന്വേഷണം (ഓപ്പറേഷൻ നുംഖോർ)
നികുതി വെട്ടിച്ച് ഭൂട്ടാൻ വഴി ഇന്ത്യയിലേക്ക് ആഡംബര കാറുകൾ കടത്തിയെന്ന കേസിൽ സംസ്ഥാന വ്യാപകമായി കസ്റ്റംസ് നടത്തിയ പരിശോധനയാണ് ‘ഓപ്പറേഷൻ നുംഖോർ’ എന്നറിയപ്പെടുന്നത്.
ഈ അന്വേഷണത്തിന്റെ ഭാഗമായാണ് ദുൽഖർ സൽമാന്റെ പനമ്പള്ളി നഗറിലെ വീട്ടിൽ ഉൾപ്പെടെ കസ്റ്റംസ് പരിശോധന നടത്തുകയും അദ്ദേഹത്തിന്റെ ഉടമസ്ഥതയിലുള്ള ലാൻഡ് റോവർ ഡിഫെൻഡർ (2004 മോഡൽ, തമിഴ്‌നാട് രജിസ്ട്രേഷൻ) ഉൾപ്പെടെയുള്ള വാഹനങ്ങൾ പിടിച്ചെടുക്കുകയും ചെയ്തത്.
നാല് വാഹനങ്ങളാണ് കസ്റ്റംസിന്റെ അന്വേഷണ പരിധിയിലുള്ളതെങ്കിലും ഇതിൽ ഒരു ലാൻഡ് റോവറും പിന്നീട് ബന്ധുവിന്റെ ഫ്ലാറ്റിൽ നിന്ന് ഒരു നിസ്സാൻ പട്രോൾ കാറും കസ്റ്റംസ് പിടിച്ചെടുത്തിരുന്നു. രേഖകൾ ശരിയല്ലാത്ത 30-ൽ അധികം വാഹനങ്ങളാണ് സംസ്ഥാന വ്യാപകമായി കസ്റ്റംസ് പിടിച്ചെടുത്തത്.
