ശംഖുംമുഖം: കുവൈറ്റിൽ നിന്ന് തിരുവനന്തപുരം വിമാനത്താവളത്തിലെത്തിയ കുവൈറ്റ് എയർവേയ്‌സ് വിമാനത്തിന് ലാൻഡിങ്ങിനിടെ പക്ഷിയിടിച്ചു. വ്യാഴാഴ്ച പുലർച്ചെ റൺവേയിൽ ഇറങ്ങാൻ തുടങ്ങുന്നതിനിടെയാണ് പക്ഷി വിമാനത്തിന് നേരെ വന്നത്. സെക്കൻഡുകൾക്കുള്ളിൽ പൈലറ്റിന്റെ സമയോചിതമായ ഇടപെടലും നിയന്ത്രണവും കാരണം വിമാനം സുരക്ഷിതമായി ലാൻഡിങ് നടത്തി, വൻ ദുരന്തം ഒഴിവാക്കി.
അതീവ ഗുരുതരമായ സംഭവമായതിനാൽ പൈലറ്റ് ഉടൻതന്നെ പക്ഷിയിടി റിപ്പോർട്ട് ചെയ്തു. റിപ്പോർട്ടിന്റെ അടിസ്ഥാനത്തിൽ ഡയറക്ടർ ജനറൽ ഓഫ് സിവിൽ ഏവിയേഷൻ (ഡി.ജി.സി.എ.) അന്വേഷണം ആരംഭിക്കും.
ആവർത്തിക്കുന്ന പക്ഷിയിടികൾ
- ഇൻഡിഗോ വിമാനം: കഴിഞ്ഞ ഒരാഴ്ചയ്ക്കുള്ളിൽ തിരുവനന്തപുരത്ത് ലാൻഡിങ്ങിനെത്തിയ എയർ ഇന്ത്യ, ഇൻഡിഗോ, മാലി എയർലൈൻസ് വിമാനങ്ങൾക്ക് നേരെ പലവട്ടമാണ് പക്ഷികൾ പറന്നടുത്തത്. ഇതിൽ ഇൻഡിഗോ വിമാനത്തിന്റെ ചിറകിൽ ഇടിച്ച പക്ഷി വിമാനത്താവളത്തിനു പുറത്ത് ചത്തുവീണു.
- ലാന്റിങ് തടസ്സപ്പെട്ടു: ചത്തുവീണ പക്ഷിക്ക് ചുറ്റും പക്ഷിക്കൂട്ടം വട്ടമിട്ട് പറന്നതോടെ പല വിമാനങ്ങൾക്കും ലാൻഡിങ് നടത്താൻ ഏറെ ബുദ്ധിമുട്ടുണ്ടായി.
ലാൻഡിങ് സമയത്ത് റൺവേയിൽനിന്ന് പക്ഷികളെ പടക്കമെറിഞ്ഞ് തുരത്താനുള്ള സംവിധാനങ്ങളുണ്ടെങ്കിലും, റൺവേയ്ക്ക് ചുറ്റും ഉയരത്തിൽ പറന്നിറങ്ങുന്ന പക്ഷികളെ തുരത്താനുള്ള സംവിധാനങ്ങൾ ഇതുവരെ ഫലപ്രദമായി നടപ്പിലാക്കാൻ കഴിഞ്ഞിട്ടില്ല. ഈ സാഹചര്യം തുടർന്നാൽ കേരളത്തിലെ വിമാനത്താവളങ്ങളിൽ വലിയ വിമാന ദുരന്തങ്ങൾക്ക് വഴിയൊരുക്കുമെന്ന് ആശങ്കയുണ്ട്.
A Kuwait Airways flight arriving at Thiruvananthapuram airport experienced a bird strike during landing
