ശ്രീകുമാർ ഉണ്ണിത്താൻ
ന്യൂ യോർക്ക്: ഫൊക്കാന ന്യൂ യോർക്ക് അപ്‌സ്റ്റേറ്റ് റീജിയണൽ കൺവെൻഷൻ 2025 ഒക്ടോബർ 25, ശനിയാഴ്ച, റോക്ക്‌ലാൻഡ് കൗണ്ടിയിലെ ക്‌നാനായ കമ്മ്യൂണിറ്റി സെന്ററിൽ വെച്ച് (400 Willow Grove Road, Stoney Point, Rockland County) വിവിധ പരിപാടികളോടെ നടക്കുമ്പോൾ മുഖ്യാതിഥിയായി ഫാദർ ഡേവിസ് ചിറമേൽ പങ്കെടുക്കുന്നു.
ഫൊക്കാന റീജിയണൽ കൺവെൻഷനോട് അനുബന്ധിച്ച് ഫുഡ് ഫെസ്റ്റിവൽ, യൂത്ത് ഫെസ്റ്റിവൽ, സ്പെല്ലിങ് ബീ കോമ്പറ്റീഷൻ, ചീട്ടുകളി മത്സരം, ഫൊക്കാന കിക്ക് ഓഫ് തുടങ്ങിയ നിരവധി പരിപാടികളാണ് ചിട്ടപ്പെടുത്തിയിട്ടുള്ളത്. വൈകിട്ട് നടക്കുന്ന പൊതുസമ്മേളനത്തിൽ ഫാദർ ഡേവിസ് ചിറമേൽ മുഖ്യാതിഥിയായി പങ്കെടുക്കും. വളരെ സരസമായി തൃശ്ശൂർ ശൈലിയിൽ സംസാരിക്കുന്ന അച്ചന്റെ പ്രസംഗങ്ങൾക്ക് ആരാധകർ ഏറെയുണ്ട്.
സാമൂഹിക സേവന പ്രവർത്തനങ്ങൾ കൊണ്ട് പ്രശസ്തനായ അദ്ദേഹം, അവയവദാനവുമായി ബന്ധപ്പെട്ട സന്നദ്ധസംഘടനയായ കിഡ്‌നി ഫെഡറേഷൻ ഓഫ് ഇന്ത്യയുടെ സ്ഥാപകനും ചെയർമാനുമാണ്. സ്വന്തം വൃക്ക (കിഡ്‌നി) ദാനം ചെയ്താണ് അദ്ദേഹം ഈ സ്ഥാപനത്തിന്റെ പ്രവർത്തനങ്ങൾക്ക് തുടക്കം കുറിച്ചത്.
മനുഷ്യർക്ക് ഹൃദയത്തിൽ നിറയെ അലിവുണ്ടാവണമെന്നും, നമ്മളെക്കൊണ്ട് മറ്റുള്ളവർക്ക് എന്തു ഗുണം കിട്ടുമെന്ന് ഓരോരുത്തരും ചിന്തിക്കുകയും പ്രവർത്തിക്കുകയും വേണമെന്നും, അങ്ങനെയുള്ള മനുഷ്യരിൽ ദൈവത്തിന്റെ കടാക്ഷം ഉണ്ടാകുമെന്നും അച്ഛൻ എപ്പോഴും പറയാറുണ്ട്. അത് തന്നെയാണ് ഫാദർ ഡേവിസ് ചിറമേൽ തന്റെ പ്രവൃത്തികളിലൂടെ ലോകത്തിന് കാട്ടുന്നതും. പലരുടെയും മുന്നിൽ അദ്ദേഹം പല രൂപത്തിൽ ദൈവത്തിന്റെ പ്രതീകമായി സഹായവുമായി എത്താറുണ്ട്. ദൈവം ചെയ്യേണ്ടുന്ന കർമ്മങ്ങൾ തന്നെയാണ് അദ്ദേഹം സമൂഹത്തിനുവേണ്ടി ചെയ്യുന്നത്.
ഒക്ടോബർ 25-ആം തീയതി ശനിയാഴ്ച നടക്കുന്ന റീജിയണൽ കൺവെൻഷനിലേക്ക് ഏവരെയും സ്വാഗതം ചെയ്യുന്നതായി റീജിയണൽ വൈസ് പ്രസിഡന്റ് ആന്റോ വർക്കി, റീജിയണൽ കോർഡിനേറ്റർ ഷീല ജോസഫ്, റീജിയണൽ സെക്രട്ടറി അഭിലാഷ് പുളിക്കത്തൊടി, റീജിയണൽ ട്രഷറർ ഷൈമി ജേക്കബ്, റീജിയണൽ ജോയിന്റ് സെക്രട്ടറി സാജൻ മാത്യു, റീജിയണൽ സ്പോർട്സ് കോർഡിനേറ്റർ ലിജോ ജോൺ, യൂത്ത് ഫെസ്റ്റിവൽ കോർഡിനേറ്റർ റോയി ആന്റണി, റീജിയണൽ വിമൻസ് ഫോറം കോർഡിനേറ്റർ ഷൈനി ഷാജൻ എന്നിവർ അറിയിച്ചു.
Fokana New York Upstate Regional Convention: Chief Guest Father Davis Chiramel
