ന്യൂഡൽഹി: താരിഫ് തർക്കങ്ങൾക്കിടെ വിദേശകാര്യ മന്ത്രി എസ്. ജയശങ്കർ ഇന്ത്യയിലെ നിയുക്ത യു.എസ്. അംബാസിഡർ സെർജിയോ ഗോറുമായി ഡൽഹിയിൽ കൂടിക്കാഴ്ച നടത്തി. ഇന്ത്യയും അമേരിക്കയും തമ്മിലുള്ള തന്ത്രപരമായ ബന്ധം ശക്തിപ്പെടുത്തുന്നതിനെക്കുറിച്ച് ഇരുവരും ചർച്ച നടത്തി. പുതിയ ഉത്തരവാദിത്തത്തിൽ എല്ലാവിധ ആശംസകളും ജയശങ്കർ ഗോറിനെ അറിയിച്ചു.
യു.എസ്. ഡെപ്യൂട്ടി സെക്രട്ടറി മൈക്കിൾ ജെ. റിഗാസിനൊപ്പമാണ് സെനറ്റ് സ്ഥിരീകരണത്തിനുശേഷം ഇന്ത്യയിലെ യു.എസ്. പ്രതിനിധിയായി നിയമിതനായ ഗോർ ആറു ദിവസത്തെ ഇന്ത്യാ സന്ദർശനത്തിനെത്തിയത്. “ഇന്ത്യ-യു.എസ്. ബന്ധത്തെക്കുറിച്ചും അതിൻ്റെ ആഗോള പ്രാധാന്യത്തെക്കുറിച്ചും ചർച്ച ചെയ്തു. അദ്ദേഹത്തിന് പുതിയ ഉത്തരവാദിത്തത്തിൽ എല്ലാവിധ ആശംസകളും നേരുന്നുവെന്ന് കൂടിക്കാഴ്ചയ്ക്ക് ശേഷം ജയശങ്കർ ‘എക്‌സി’ൽ കുറിച്ചു.
ഇന്ത്യൻ ഉത്പന്നങ്ങൾക്ക് 50% അധിക താരിഫ് ഏർപ്പെടുത്താനുള്ള വാഷിംഗ്ടൺ്റെ തീരുമാനത്തെത്തുടർന്നുണ്ടായ വ്യാപാര തർക്കങ്ങൾക്കിടയിലാണ് ഗോറിൻ്റെ ഇന്ത്യാ സന്ദർശനമെന്നത് ശ്രദ്ധേയമാണ്. പ്രതിരോധ-സുരക്ഷാ സഹകരണം ശക്തിപ്പെടുത്തുന്നതിനാണ് താൻ പ്രഥമ പരിഗണന നൽകുകയെന്ന് ഗോർ വ്യക്തമാക്കി. ഔദ്യോഗിക നിയമനവും സ്ഥാനപത്രം സമർപ്പിക്കലും പിന്നീട് നടക്കുമെന്നാണ് യു.എസ്. എംബസി അറിയിച്ചിരിക്കുന്നത്.
