വാഷിംഗ്ടൺ: അമേരിക്കയിൽ ഫെഡറൽ വിദ്യാഭ്യാസ വായ്പകൾ എടുത്ത വിദ്യാർഥികൾക്ക് വായ്പയിൽ വലിയ ഇളവുകൾ നല്കുമെന്ന് സൂചന. വരുമാനത്തെ അടിസ്ഥാനപ്പെടുത്തിയുള്ള തിരിച്ചടവ് പദ്ധതിയിലൂടെ ലക്ഷക്കണക്കിന് വിദ്യാർഥികളുടെ വായ്പകൾ എഴുതിത്തള്ളാൻ വിദ്യാഭ്യാസ വകുപ്പ് തീരുമാനിച്ചതായി റിപ്പോർട്ട്.
വരുമാനം അടിസ്ഥാനപ്പെടുത്തിയുള്ള വായ്പ പദ്ധതിയുടെ അടിസ്ഥാനത്തിൽ, 300 തവണ കൃത്യമായി അടച്ചവർക്ക് പൂർണമായ വായ്പാ ഇളവിന് അർഹതയുണ്ട്. വായ്പാ ഇളവിന്റെ നടപടിക്രമങ്ങൾ ഈ മാസം 21ന് ശേഷം ആരംഭിക്കുമെന്നാണ് റിപ്പോർട്ട്.
വായ്പാ ഇളവിനുള്ള യോഗ്യതവരുമാന അടിസ്ഥാന തിരിച്ചടവ് പദ്ധതി പ്രകാരം, ഫെഡറൽ വിദ്യാർഥി വായ്പകൾ തിരിച്ചടച്ചുകൊണ്ടിരിക്കുന്ന 20 ലക്ഷത്തോളം ആളുകൾക്ക് അവരുടെ വായ്പകൾ എഴുതിത്തള്ളാൻ സാധ്യതയുണ്ട്.
അമേരിക്കൻ റെസ്ക്യൂ പ്ലാൻ പ്രകാരം, എഴുതിത്തള്ളിയ ഫെഡറൽ വിദ്യാർഥി വായ്പകൾ ഡിസംബർ 31വരെ ഫെഡറൽ നികുതികളിൽനിന്ന് ഒഴിവാക്കിയിട്ടുണ്ട്. അതിനുശേഷം എഴുതിത്തള്ളുന്ന വായ്പയും നികുതിക്ക് വിധേയമായേക്കും..
ഈ വർഷം വിദ്യാഭ്യാസ വകുപ്പ് വായ്പ എഴുതിത്തള്ളുന്നത് താൽക്കാലികമായി നിർത്തിവെച്ചിരുന്നു. ഇതിനെതിര അമേരിക്കൻ ഫെഡറേഷൻ ഓഫ് ടീച്ചേഴ്സ് നിയമനടപടികൾ ആരംഭിച്ചിരുന്നു.
US Department of Education to forgive federal student loans
