യുഎസിൽ ഗവൺമെന്റ് ഷട്ട്ഡൗൺ; ഏഴ് വർഷത്തിന് ശേഷം ആദ്യം, ലക്ഷക്കണക്കിന് ജീവനക്കാർക്ക് ശമ്പളം മുടങ്ങും

വാഷിംഗ്ടൺ: യുഎസ് സർക്കാരിന്റെ ഫണ്ടിംഗ് പാക്കേജ് പാസാക്കാനുള്ള റിപ്പബ്ലിക്കൻ പാർട്ടി ശ്രമങ്ങളെ ഡെമോക്രാറ്റുകൾ തടഞ്ഞതോടെ, ഏഴ് വർഷത്തിനിടെ ആദ്യമായി രാജ്യം ഔദ്യോഗികമായി ഷട്ട്ഡൗണിലേക്ക് നീങ്ങി. അർദ്ധരാത്രി സമയം അവസാനിച്ചതോടെ സർക്കാർ ഫണ്ടിംഗ് പ്രതിസന്ധിയിലായി. ഷട്ട്ഡൗൺ കാരണം, അടിയന്തിരമല്ലാത്ത എല്ലാ സർക്കാർ പ്രവർത്തനങ്ങളും തടസ്സപ്പെടും. ഇതോടെ, ലക്ഷക്കണക്കിന് സിവിൽ സർവീസുകാർക്ക് താൽക്കാലികമായി ശമ്പളം ലഭിക്കാതെ വരും. കൂടാതെ നിരവധി സാമൂഹിക സുരക്ഷാ പദ്ധതികളുടെ ആനുകൂല്യ വിതരണത്തിലും തടസ്സങ്ങൾ ഉണ്ടാകാൻ സാധ്യതയുണ്ട്.

അവശ്യ സേവന വിഭാഗത്തിൽപ്പെട്ട സൈനികർ ഉൾപ്പെടെയുള്ളവർക്ക് ശമ്പളമില്ലാതെ ജോലി ചെയ്യേണ്ടി വരും. അതേസമയം, അടിയന്തിരമല്ലാത്ത ജീവനക്കാരെ താൽക്കാലിക അവധിയിൽ പ്രവേശിപ്പിക്കും. കണക്കുകൾ പ്രകാരം, പ്രസിഡന്റ് സ്ഥിരമായി പിരിച്ചുവിടാൻ തീരുമാനിച്ചില്ലെങ്കിൽ പോലും, ഏകദേശം 750,000 ഫെഡറൽ ജീവനക്കാർക്ക് താൽക്കാലികമായി അവധി നൽകേണ്ടിവരും. ഷട്ട്ഡൗൺ നീണ്ടുപോയാൽ, ജീവനക്കാരിൽ കുറേ പേരെയെങ്കിലും സ്ഥിരമായി പിരിച്ചുവിടുമെന്ന് പ്രസിഡന്റ് ചൊവ്വാഴ്ച പറഞ്ഞിരുന്നു. സാധാരണഗതിയിൽ, ഷട്ട്ഡൗൺ അവസാനിക്കുമ്പോൾ ജീവനക്കാർക്ക് കുടിശ്ശിക ശമ്പളം നൽകാറുണ്ട്.

ഷട്ട്ഡൗൺ കാലത്തും തടസ്സമില്ലാതെ പ്രവർത്തിക്കുന്നത് എന്തെല്ലാം?

ഷട്ട്ഡൗൺ സമയത്തും ചില സുപ്രധാന സർക്കാർ പ്രവർത്തനങ്ങൾ തടസ്സമില്ലാതെ തുടരും.

നാസയുടെ ബഹിരാകാശ ദൗത്യങ്ങൾ

പ്രസിഡൻ്റ് ഡൊണാൾഡ് ട്രംപിൻ്റെ കുടിയേറ്റ വിരുദ്ധ നടപടികൾ

ഫുഡ് ആൻഡ് ഡ്രഗ് അഡ്മിനിസ്‌ട്രേഷൻ യുണൈറ്റഡ് സ്റ്റേറ്റ്സ് ഡിപ്പാർട്ട്‌മെന്റ് ഓഫ് അഗ്രികൾച്ചർ (USDA) എന്നിവിടങ്ങളിലെ പൊതുജനാരോഗ്യ പ്രവർത്തനങ്ങൾ.

ആശുപത്രികളിലെ ചികിത്സാ പരിചരണം, അതിർത്തി സംരക്ഷണം, നിയമ നിർവ്വഹണം, എയർ ട്രാഫിക് നിയന്ത്രണം എന്നിവയും തുടർന്നും പ്രവർത്തിക്കുമെന്ന് പ്രതീക്ഷിക്കുന്നു.

സോഷ്യൽ സെക്യൂരിറ്റി, മെഡികെയർ ചെക്കുകൾ അയക്കുന്നത് തുടരും, എന്നാൽ ആനുകൂല്യങ്ങളുടെ പരിശോധനകളും കാർഡ് വിതരണവും നിലച്ചേക്കാം.

താൽക്കാലികമായി നിലയ്ക്കാൻ സാധ്യതയുള്ള സേവനങ്ങൾ

ഫുഡ് അസിസ്റ്റൻസ് പ്രോഗ്രാം (ഭക്ഷണ സഹായ പദ്ധതി)

കേന്ദ്ര ഫണ്ടുള്ള പ്രീ-സ്കൂൾ പ്രവർത്തനങ്ങൾ

വിദ്യാർത്ഥി വായ്പകൾ അനുവദിക്കുന്നത്

ഭക്ഷ്യവസ്തുക്കളുടെ പരിശോധനകൾ

ദേശീയ ഉദ്യാനങ്ങളിലെ പ്രവർത്തനങ്ങൾ

ഈ പ്രതിസന്ധി നീണ്ടുപോവുകയും ശമ്പളം ലഭിക്കാത്ത ജീവനക്കാർ ജോലിക്ക് വരാതിരിക്കുകയും ചെയ്താൽ വിമാനയാത്ര ഉൾപ്പെടെയുള്ള കാര്യങ്ങളിൽ തടസ്സങ്ങൾ ഉണ്ടാകാനുള്ള സാധ്യതയുമുണ്ട്.