അഫ്ഗാനിസ്ഥാനും പാകിസ്ഥാനും തമ്മിലുള്ള സമാധാന ചർച്ചകൾ പരാജയപ്പെട്ടതായി താലിബാൻ ശനിയാഴ്ച സ്ഥിരീകരിച്ചു. അതിർത്തിയിൽ വീണ്ടും സംഘർഷങ്ങൾ ഉണ്ടാകുന്നത് തടയാൻ ഇസ്താംബൂളിൽ വെച്ച് നടന്ന ചർച്ചകളാണ് തീരുമാനമാകാതെ അവസാനിച്ചത്. പാകിസ്ഥാൻ്റെ ആഭ്യന്തര സുരക്ഷയുടെ ഉത്തരവാദിത്തം അഫ്ഗാനിസ്ഥാൻ ഏറ്റെടുക്കണം എന്ന ഇസ്ലാമാബാദിന്റെ കടുത്ത ആവശ്യം ചർച്ചകൾ വഴിമുട്ടാൻ കാരണമായി.
അതേസമയം, നിലവിലുള്ള വെടിനിർത്തൽ തുടരുമെന്നും താലിബാൻ വ്യക്തമാക്കിയിട്ടുണ്ട്. അഫ്ഗാൻ മണ്ണിൽ നിന്ന് തങ്ങൾക്കെതിരെ ആക്രമണങ്ങൾ ഉണ്ടാകുന്നില്ലെങ്കിൽ വെടിനിർത്തൽ തുടരുമെന്ന് പാകിസ്ഥാൻ പ്രതിരോധ മന്ത്രി ഖവാജ മുഹമ്മദ് ആസിഫും അറിയിച്ചു. ഒക്ടോബറിൽ ഇരു രാജ്യങ്ങളുടെയും സൈന്യങ്ങൾ ഏറ്റുമുട്ടിയതിനെ തുടർന്ന് ഡസൻ കണക്കിന് ആളുകൾ കൊല്ലപ്പെട്ടിരുന്നു. 2021-ൽ താലിബാൻ അധികാരം പിടിച്ചെടുത്തതിന് ശേഷമുള്ള ഏറ്റവും മോശമായ സംഘർഷമായിരുന്നു ഇത്.
നേരത്തെ, ദോഹയിൽ ഒക്ടോബറിൽ ഇരുരാജ്യങ്ങളും വെടിനിർത്തൽ കരാറിൽ ഒപ്പുവെച്ചിരുന്നു. എന്നാൽ ഇസ്താംബൂളിൽ നടന്ന രണ്ടാംഘട്ട ചർച്ചകൾ ഒരു ദീർഘകാല ഉടമ്പടിയിലെത്താതെ പരാജയപ്പെടുകയായിരുന്നു. പാകിസ്ഥാന് ശത്രുതയുള്ള തീവ്രവാദ ഗ്രൂപ്പുകൾ അഫ്ഗാനിസ്ഥാനിൽ പ്രവർത്തിക്കുന്നതിനെ ചൊല്ലിയുള്ള അഭിപ്രായവ്യത്യാസങ്ങളാണ് പ്രധാനമായും തടസ്സമുണ്ടാക്കിയത്. തുർക്കി പ്രസിഡന്റ് തയ്യിപ് എർദോഗൻ പാക് പ്രധാനമന്ത്രി ഷെഹ്ബാസ് ഷെരീഫുമായി കൂടിക്കാഴ്ച നടത്തുകയും ചർച്ചകൾ സുസ്ഥിരമായ ഫലം നൽകുമെന്ന് പ്രത്യാശ പ്രകടിപ്പിക്കുകയും ചെയ്തു.
