ഷെയ്ഖ് ഹസീനയെ കൈമാറണമെന്ന് ഇന്ത്യയോട് രേഖാമൂലം ആവശ്യപ്പെട്ട് ബംഗ്ലാദേശ്
മുൻ പ്രധാനമന്ത്രി ഷെയ്ഖ് ഹസീനയെ കൈമാറണമെന്ന് ആവശ്യപ്പെട്ട് ബംഗ്ലാദേശ് ഇന്ത്യയ്ക്ക് ഔദ്യോഗിക നയതന്ത്ര കുറിപ്പ് കൈമാറി. ഈയിടെ ബംഗ്ലാദേശിലെ ഇന്റർനാഷണൽ ക്രൈംസ് ട്രൈബ്യൂണൽ ഷെയ്ഖ് ഹസീനയെ മനുഷ്യരാശിക്കെതിരായ കുറ്റങ്ങൾക്ക് വധശിക്ഷയ്ക്ക് വിധിച്ചിരുന്നു. ഈ വിധിയുടെ പശ്ചാത്തലത്തിലാണ് ഹസീനയെ വിട്ടുനൽകണമെന്ന് ആവശ്യപ്പെട്ടുകൊണ്ട് ബംഗ്ലാദേശ് ഇടക്കാല സർക്കാർ ന്യൂഡൽഹിയിലെ ഹൈക്കമ്മീഷൻ വഴി നയതന്ത്ര കുറിപ്പ് അയച്ചത്. നിലവിൽ ഇന്ത്യയിലുള്ള ഷെയ്ഖ് ഹസീനയെ എത്രയും പെട്ടെന്ന് ബംഗ്ലാദേശ് അധികൃതർക്ക് കൈമാറണമെന്ന് അവർ രേഖാമൂലം ആവശ്യപ്പെട്ടിട്ടുണ്ട്.
പൗരത്വത്തെയും മറ്റ് വിഷയങ്ങളെയും കുറിച്ച് ഇന്ത്യയും ബംഗ്ലാദേശും തമ്മിലുള്ള നിലവിലുള്ള കൈമാറൽ കരാർ പ്രകാരമുള്ള ബാധ്യതയാണിതെന്ന് ബംഗ്ലാദേശ് വിദേശകാര്യ മന്ത്രാലയം പ്രസ്താവനയിൽ വ്യക്തമാക്കി.
അതേസമയം, അയൽരാജ്യം എന്ന നിലയിൽ ബംഗ്ലാദേശിലെ സമാധാനം, ജനാധിപത്യം, സ്ഥിരത എന്നിവയ്ക്ക് വേണ്ടി ക്രിയാത്മകമായി എല്ലാ കക്ഷികളുമായി ഇടപെടുമെന്ന് മാത്രമാണ് ഈ വിഷയത്തിൽ ഇന്ത്യൻ വിദേശകാര്യ മന്ത്രാലയം പ്രതികരിച്ചത്. വിധി ശ്രദ്ധയിൽപ്പെട്ടിട്ടുണ്ടെന്നും അവർ അറിയിച്ചു. ഇരുരാജ്യങ്ങളും തമ്മിലുള്ള നയതന്ത്രബന്ധത്തിൽ ഈ ആവശ്യം ഒരു പുതിയ പ്രതിസന്ധി സൃഷ്ടിച്ചിരിക്കുകയാണ്.
