ലണ്ടൻ: ലോകമെമ്പാടും ഇന്റർനെറ്റ് തടസ്സപ്പെട്ടു. എക്‌സ് (മുമ്പ് ട്വിറ്റർ), ചാറ്റ്ജിപിടി ഉൾപ്പെടെ നിരവധി പ്രമുഖ വെബ്‌സൈറ്റുകൾ പ്രവർത്തനരഹിതമായി. ഇന്റർനെറ്റ് അടിസ്ഥാന സൗകര്യദാതാക്കളായ ‘ക്ലൗഡ്ഫ്ലെയറി’നെ ബാധിച്ച പ്രശ്‌നങ്ങളാണ് കാരണമായതെന്നാണ് റിപ്പോർട്ടുകൾ.
ചൊവ്വാഴ്ച ഉച്ചയ്ക്ക് 11:30 (ഏകദേശം ഇന്ത്യൻ സമയം 5:00 PM) കഴിഞ്ഞയുടനെയാണ് എക്‌സ് ഉൾപ്പെടെയുള്ള സേവനങ്ങളിൽ ആയിരക്കണക്കിന് ഉപയോക്താക്കൾ പ്രശ്‌നങ്ങൾ റിപ്പോർട്ട് ചെയ്തത്.
എക്‌സ്, ചാറ്റ്ജിപിടി പോലുള്ള പ്രധാന പ്ലാറ്റ്‌ഫോമുകളെയാണ് തകരാർ ബാധിച്ചത്. എക്‌സിന്റെ ഹോംപേജിൽ, ക്ലൗഡ്ഫ്ലെയറിൽ നിന്നുള്ള ഒരു ‘എറർ’ കാരണമാണ് ആഭ്യന്തര സെർവറിൽ പ്രശ്‌നമുണ്ടായതെന്ന സന്ദേശം കാണിച്ചിരുന്നു.
- പ്രശ്‌നങ്ങളെക്കുറിച്ച് അറിവുണ്ടെന്നും വിഷയം അന്വേഷിച്ച് വരികയാണെന്നും ക്ലൗഡ്ഫ്ലെയർ അറിയിച്ചു. പിന്നീട്, പല സേവനങ്ങളും സാധാരണ നിലയിലേക്ക് തിരിച്ചുവരുന്നതായി കമ്പനി അറിയിച്ചെങ്കിലും, പൂർണ്ണമായ പരിഹാരത്തിനായി ശ്രമങ്ങൾ തുടരുകയാണെന്ന് വ്യക്തമാക്കി.
- ലോകമെമ്പാടുമുള്ള ഇന്റർനെറ്റ് സുരക്ഷാ ദാതാക്കളിൽ പ്രമുഖരാണ് ക്ലൗഡ്ഫ്ലെയർ. ലോകമെമ്പാടുമുള്ള 20% വെബ്‌സൈറ്റുകളും ഏതെങ്കിലും രൂപത്തിൽ ഇവരുടെ സേവനങ്ങൾ ഉപയോഗിക്കുന്നുണ്ട്.
- ആമസോൺ വെബ് സർവീസസിനെ (AWS) ബാധിച്ച തകരാറിന് പിന്നാലെ ക്ലൗഡ്ഫ്ലെയറിലുണ്ടായ ഈ പ്രശ്‌നം, ആധുനിക ഇന്റർനെറ്റ് ഘടനയുടെ ദുർബലതയാണ് എടുത്തു കാണിക്കുന്നത്. ഇന്റർനെറ്റിന്റെ അടിസ്ഥാന സൗകര്യങ്ങൾ നിയന്ത്രിക്കുന്ന കുറഞ്ഞ എണ്ണം കമ്പനികളിൽ ഉണ്ടാകുന്ന പ്രശ്‌നങ്ങൾ പോലും വലിയ തടസ്സങ്ങൾക്ക് കാരണമായേക്കാം എന്നതിലേക്കാണ് വിദഗ്ധർ വിരൽ ചൂണ്ടുന്നത്.
