വാഷിംഗ്ടൺ: എഫ്ബിഐ ഡയറക്ടർ കാഷ് പട്ടേൽ തൻ്റെ കാമുകിയും കൺട്രി ഗായികയുമായ അലക്സിസ് വിൽക്കിൻസിന് സംരക്ഷണം നൽകാൻ സ്വാറ്റ് ഏജൻ്റുമാരെയും മറ്റ് സർക്കാർ സംവിധാനങ്ങളെയും ഉപയോഗിച്ചതായുള്ള റിപ്പോർട്ടുകൾ പുറത്ത് വന്നതോടെ പ്രതിരോധത്തിൽ. ഇതിന് നിയമപരമായ ഒരു ന്യായീകരണവുമില്ല എന്ന് മുൻ സീനിയർ ഏജൻ്റ് ക്രിസ്റ്റഫർ ഒ’ലിയറി എംഎസ് നൗവിനോട് പറഞ്ഞു. വിൽക്കിൻസ് അദ്ദേഹത്തിൻ്റെ ഭാര്യയല്ലെന്നും ഒരേ വീട്ടിലോ ഒരേ നഗരത്തിലോ താമസിക്കുന്നില്ലെന്നും അദ്ദേഹം കൂട്ടിച്ചേർത്തു.
കാഷ് പട്ടേലിൻ്റെ സ്വകാര്യ ആവശ്യങ്ങൾക്കായി സർക്കാർ ഉടമസ്ഥതയിലുള്ള ജെറ്റ് വിമാനത്തിൻ്റെ ദുരുപയോഗവും, കാമുകിക്ക് കാവലായി സ്വാറ്റ് പരിശീലനം ലഭിച്ച പ്രത്യേക ഏജൻ്റുമാരെ നിയമിച്ചതും, അദ്ദേഹത്തിന് നേതൃത്വപരിചയമില്ലെന്നും വിവേകവും വിനയവും കുറവാണെന്നും സൂചിപ്പിക്കുന്നു എന്നും അദ്ദേഹം ന്യൂയോർക്ക് ടൈംസിനോട് പറഞ്ഞു.
ഏറ്റവും ശ്രദ്ധേയമായ സംഭവം നടന്നത് അറ്റ്‌ലാൻ്റയിലെ നാഷണൽ റൈഫിൾ അസോസിയേഷൻ്റെ വാർഷിക കൺവെൻഷനിലായിരുന്നു. അവിടെ വിൽക്കിൻസ് ദേശീയ ഗാനം ആലപിച്ചു. പട്ടേലിൻ്റെ ഉത്തരവനുസരിച്ച് പ്രാദേശിക ഫീൽഡ് ഓഫീസിൽ നിന്നുള്ള രണ്ട് എഫ്ബിഐ സ്വാറ്റ് ഏജൻ്റുമാരുമായിട്ടാണ് അവർ എത്തിയത്. ഈ ഏജൻ്റുമാർ ബന്ദികളെ മോചിപ്പിക്കൽ പോലുള്ള അതീവ അപകടകരമായ ദൗത്യങ്ങൾക്കായി സാധാരണയായി വിന്യസിക്കപ്പെടുന്ന ഉന്നത ഉദ്യോഗസ്ഥരാണ്.
പരിപാടിയുടെ സ്ഥലം സുരക്ഷിതമാണെന്നും വിൽക്കിൻസിന് അപകടമില്ലെന്നും കണ്ടതിനെ തുടർന്ന് ഏജൻ്റുമാർ നേരത്തെ മടങ്ങിയതായി റിപ്പോർട്ടുണ്ട്. വിൽക്കിൻസിനെ സംരക്ഷണമില്ലാതെ വിട്ടതിലും, ആശയവിനിമയത്തിലെ പോരായ്മകളിലും പട്ടേൽ അതീവ രോഷാകുലനാവുകയും ടീം കമാൻഡറെ ശാസിക്കുകയും ചെയ്തതായി പറയപ്പെടുന്നു. പ്രമുഖ യാഥാസ്ഥിതിക വ്യക്തിത്വമായ വിൽക്കിൻസിനെ ഓൺലൈനിൽ ഭീഷണിപ്പെടുത്തിയവർ ലക്ഷ്യമിടാൻ സാധ്യതയുണ്ടെന്ന് അദ്ദേഹം വിശ്വസിച്ചിരുന്നു.
സെപ്റ്റംബർ അവസാനത്തിൽ, യൂട്ടായിൽ യാഥാസ്ഥിതിക വ്യക്തിത്വമായ ചാർലി കിർക്കിനെ കൊലപ്പെടുത്തിയ സംഭവത്തിന് മറുപടി നൽകിയ ശേഷം, സാൾട്ട് ലേക്ക് സിറ്റി ഫീൽഡ് ഓഫീസിലെ സ്വാറ്റ് ഏജൻ്റുമാരെ തിരിച്ചുവിളിക്കുകയും, വിൽക്കിൻസിനെ ലക്ഷ്യമിടാൻ സാധ്യതയുണ്ടെന്ന ഭയത്തെ തുടർന്ന് ഒരു രാഷ്ട്രീയ പരിപാടിയിൽ സംരക്ഷണം നൽകാൻ വീണ്ടും നിയമിക്കുകയും ചെയ്തു.
