കോഴിക്കോട്: കോഴിക്കോട് കോർപ്പറേഷനിലെ യുഡിഎഫ് മേയർ സ്ഥാനാർത്ഥിയും പ്രമുഖ സംവിധായകനുമായ വി.എം. വിനുവിന് ഹൈക്കോടതിയിൽനിന്ന് കനത്ത തിരിച്ചടി. വോട്ടർ പട്ടികയിൽ പേര് ചേർക്കണമെന്ന് ആവശ്യപ്പെട്ട് വിനു ഹൈക്കോടതിയിൽ സമർപ്പിച്ച ഹർജി കോടതി തള്ളി. ഇതോടെ വിനുവിന് കോർപ്പറേഷൻ തിരഞ്ഞെടുപ്പിൽ സ്ഥാനാർത്ഥിയാകാനുള്ള അവസരം നഷ്ടമായി.
വി.എം. വിനുവിന്റെ പേര് നിലവിൽ വോട്ടർ പട്ടികയിൽ ഉൾപ്പെട്ടിരുന്നില്ല. ഒരു സ്ഥാനാർത്ഥിക്ക് മത്സരിക്കുന്നതിന് വോട്ടർ പട്ടികയിൽ പേര് നിർബന്ധമാണ്. വോട്ടർ പട്ടികയിൽ പേര് ചേർക്കുന്നതിന് അനുവദിക്കണമെന്ന് ആവശ്യപ്പെട്ടാണ് അദ്ദേഹം ഹൈക്കോടതിയെ സമീപിച്ചത്. എന്നാൽ, ഈ അപേക്ഷ ഹൈക്കോടതി തള്ളുകയായിരുന്നു. ഹർജി തള്ളിയതോടെ വി.എം. വിനുവിന് തിരഞ്ഞെടുപ്പിൽ മത്സരിക്കാനോ യു.ഡി.എഫ്. മേയർ സ്ഥാനാർത്ഥിയായി തുടരാനോ കഴിയില്ല. യു.ഡി.എഫ്. മുന്നണിയെ സംബന്ധിച്ച് ഈ വിധി കനത്ത ആഘാതമാണ് സൃഷ്ടിച്ചിരിക്കുന്നത്.
