ചണ്ഡിഗഢ്: രാജ്യത്തെ ഏറ്റവും വിലകൂടിയ കാർ രജിസ്ട്രേഷൻ നമ്പർ എന്ന റെക്കോർഡ് ഹരിയാനയിൽ ലേലം ചെയ്ത ‘HR88B8888’ എന്ന നമ്പറിന് സ്വന്തമായി. 1.17 കോടി രൂപയ്ക്കാണ് ഈ ഫാൻസി നമ്പർ പ്ലേറ്റ് ഓൺലൈൻ ലേലത്തിൽ വിറ്റുപോയത്.
ഇതുവരെ ഇന്ത്യയിൽ വിറ്റഴിച്ച വാഹന രജിസ്ട്രേഷൻ നമ്പറുകളിൽ ഏറ്റവും ഉയർന്ന തുകയാണിത്. ഹരിയാന ട്രാൻസ്പോർട്ട് വകുപ്പ് എല്ലാ ആഴ്ചയും വിഐപി നമ്പറുകൾക്കായി ഓൺലൈൻ ലേലം നടത്താറുണ്ട്. ഈ ആഴ്ച ലേലത്തിന് വെച്ച ‘HR88B8888’ എന്ന നമ്പറിനായി 45 അപേക്ഷകളാണ് ലഭിച്ചത്.
50,000 രൂപ അടിസ്ഥാന ലേലവില നിശ്ചയിച്ചിരുന്നെങ്കിലും, വാശിയേറിയ ലേലം വിളിയിൽ വില ഓരോ മിനിറ്റിലും വർദ്ധിച്ചു. ലേലം അവസാനിക്കുമ്പോൾ തുക 1.17 കോടി രൂപയിൽ എത്തുകയായിരുന്നു.
ഈ നമ്പറിന്റെ പ്രധാന ആകർഷണം, ഇതിലെ ‘B’ എന്ന വലിയ അക്ഷരം ‘8’ എന്ന അക്കത്തിന് സമാനമായി തോന്നുന്നതിനാൽ, ഇത് തുടർച്ചയായ എട്ടുകളുടെ ഒരു നിര പോലെ കാണപ്പെടുന്നു എന്നതാണ്. ഹരിയാനയുടെ സംസ്ഥാന കോഡാണ് ‘HR’.
