തിരുവനന്തപുരം: യൂത്ത് കോൺഗ്രസ് നേതാവ് രാഹുൽ മാങ്കൂട്ടത്തിലിനെതിരെ ഗുരുതര ലൈംഗികാതിക്രമം ആരോപിച്ചുള്ള എഫ്ഐആറിന്റെ പകർപ്പ് പുറത്തുവിട്ടു. 2025 മാർച്ച് 4-ന് തൃക്കണ്ണാപുരത്തെ ഫ്ലാറ്റിൽ വെച്ച് അതിജീവിതയെ ബലമായി പീഡിപ്പിക്കുകയും ദേഹോപദ്രവം ഏൽപ്പിച്ച് ലൈംഗിക ബന്ധത്തിൽ ഏർപ്പെടുകയും ചെയ്തതായി എഫ്ഐആറിൽ പറയുന്നു. മാർച്ച് 17-ന് അതിജീവിതയുടെ ഫ്ലാറ്റിൽ വെച്ച് ഭീഷണിപ്പെടുത്തി നഗ്ന ദൃശ്യങ്ങൾ പകർത്തുകയും ഇത് പുറത്തുപറഞ്ഞാൽ ജീവിതം നശിപ്പിക്കുമെന്ന് ഭയപ്പെടുത്തുകയും ചെയ്തു.
ഏപ്രിൽ 22-ന് തൃക്കണ്ണാപുരത്തെ വീട്ടിലും പാലക്കാട്ടെ ഫ്ലാറ്റിലും വെച്ച് വീണ്ടും പീഡനം ആവർത്തിച്ചതായി എഫ്ഐആർ വെളിപ്പെടുത്തുന്നു. അതിജീവിത ഗർഭിണിയാണെന്ന് അറിഞ്ഞിട്ടും പീഡനം തുടർന്നെന്നും 2025 മേയ് 30-ന് ഗർഭം അലസിപ്പിക്കാൻ നിർബന്ധിച്ച് മരുന്ന് നൽകിയെന്നും രേഖയിൽ ആരോപിക്കുന്നു. സംഭവങ്ങൾ പുറത്തുപറയാതിരിക്കാൻ നിരന്തരം ഭീഷണിപ്പെടുത്തിയതായും എഫ്ഐആറിൽ വ്യക്തമാക്കിയിട്ടുണ്ട്.
കേസിൽ ഐപിസി 376 (2)(n), 376 (2)(k), 506, 323, 354, 354(B), 354(C), 354(D) തുടങ്ങിയ വകുപ്പുകളും പോക്സോ നിയമപ്രകാരമുള്ള വകുപ്പുകളും ചുമത്തിയിട്ടുണ്ട്. പരാതിക്കാരി നേരത്തെ മുഖ്യമന്ത്രിക്ക് നൽകിയ പരാതിയുടെ അടിസ്ഥാനത്തിൽ ക്രൈംബ്രാഞ്ചാണ് കേസ് രജിസ്റ്റർ ചെയ്തത്. എഫ്ഐആർ പുറത്തുവന്നതോടെ രാഹുൽ മാങ്കൂട്ടത്തിലിനെതിരായ ആരോപണങ്ങൾ കൂടുതൽ ഗുരുതരമായി മാറിയിരിക്കുകയാണ്.
