വടകര ഡിവൈഎസ്പി എ. ഉമേഷിനെതിരെ ഗുരുതരമായ ആരോപണങ്ങൾ ഉന്നയിച്ച ചെർപ്പുളശ്ശേരി എസ്എച്ച്ഒ ആയിരുന്ന ബിനു തോമസിന്റെ ആത്മഹത്യാക്കുറിപ്പ് പുറത്തുവന്നത് വലിയ കോളിളക്കമുണ്ടാക്കിയിരിക്കുകയാണ്. നവംബർ 15-ന് ചെർപ്പുളശ്ശേരിയിലെ പോലീസ് ക്വാർട്ടേഴ്സിലാണ് ബിനു തോമസിനെ ജീവനൊടുക്കിയ നിലയിൽ കണ്ടെത്തിയത്. 32 പേജുള്ള കുറിപ്പിലെ പ്രധാന ഭാഗങ്ങളിൽ, വടക്കാഞ്ചേരി സ്റ്റേഷനിൽ ഇൻസ്പെക്ടറായിരിക്കെ പെൺവാണിഭക്കേസിൽ കസ്റ്റഡിയിലെടുത്ത സ്ത്രീയെ ഉമേഷ് ബലാത്സംഗം ചെയ്തുവെന്ന് ബിനു തോമസ് ആരോപിക്കുന്നു. കൂടാതെ, ഈ സ്ത്രീയുടെ പേര് പറഞ്ഞ് ഡിവൈഎസ്പി തന്നെ നിരന്തരം മാനസികമായി പീഡിപ്പിച്ചിരുന്നുവെന്നും, ഇതാണ് ആത്മഹത്യയിലേക്ക് നയിച്ചതെന്നും കുറിപ്പിൽ സൂചനയുണ്ട്.
ആത്മഹത്യാക്കുറിപ്പിൽ പരാമർശിച്ചിരുന്ന സ്ത്രീ, പാലക്കാട് ജില്ലാ ക്രൈം ബ്രാഞ്ച് ഡിവൈഎസ്പിക്ക് മൊഴി നൽകിയിട്ടുണ്ട്. വടക്കാഞ്ചേരി സ്റ്റേഷനിൽ കസ്റ്റഡിയിലെടുത്ത ശേഷം നിയമനടപടികളിൽ നിന്ന് ഒഴിവാക്കാമെന്ന് വാഗ്ദാനം നൽകി ഉമേഷ് തന്നെ ബലാത്സംഗം ചെയ്തുവെന്ന ബിനു തോമസിന്റെ ആരോപണം ഇവർ ശരിവെച്ചു. ഈ മൊഴിയുടെ അടിസ്ഥാനത്തിൽ ഡിവൈഎസ്പിക്കെതിരെ ബലാത്സംഗക്കുറ്റം ചുമത്തി കേസെടുക്കാൻ സാധ്യതയുണ്ടെങ്കിലും, സംഭവം നടന്ന് പത്ത് വർഷം കഴിഞ്ഞതിനാൽ, പരാതിയുമായി മുന്നോട്ട് പോകാൻ പീഡനത്തിന് ഇരയായ സ്ത്രീ തയ്യാറായാൽ മാത്രമേ പോലീസ് കേസ് രജിസ്റ്റർ ചെയ്യുകയുള്ളൂ.
തുടർച്ചയായ മാനസിക പീഡനം മൂലമാണ് താൻ ജീവനൊടുക്കുന്നതെന്ന് ബിനു തോമസ് കുറിപ്പിൽ വ്യക്തമാക്കിയ സാഹചര്യത്തിൽ, വടകര ഡിവൈഎസ്പിക്കെതിരെ ആത്മഹത്യാ പ്രേരണക്കുറ്റം ചുമത്താനുള്ള സാധ്യതയും പോലീസ് പരിശോധിക്കുന്നുണ്ട്. ബിനു തോമസിന്റെ മരണവുമായി ബന്ധപ്പെട്ട് നിലവിൽ അസ്വാഭാവിക മരണത്തിനാണ് കേസ് രജിസ്റ്റർ ചെയ്തിട്ടുള്ളത്. ഈ കേസിന്റെ ഭാഗമായി എല്ലാ ആരോപണങ്ങളെക്കുറിച്ചും വിശദമായ അന്വേഷണം നടന്നുവരികയാണെന്ന് പാലക്കാട് ജില്ലാ പോലീസ് മേധാവി അറിയിച്ചു. മൊഴിയുടെയും ആത്മഹത്യാക്കുറിപ്പിന്റെയും അടിസ്ഥാനത്തിൽ ഡിവൈഎസ്പിക്കെതിരെ ഉടൻ കേസെടുത്തേക്കുമെന്നാണ് റിപ്പോർട്ടുകൾ.
