കൊച്ചി: പ്രമുഖ നർത്തകിയും സിനിമാ-സീരിയൽ നടിയുമായ ഊർമിള ഉണ്ണി ഭാരതീയ ജനതാ പാർട്ടിയിൽ (ബിജെപി) ചേർന്നു. കൊച്ചിയിൽ നടന്ന ഔദ്യോഗിക ചടങ്ങിൽ വെച്ച് ഊർമിള ഉണ്ണി പാർട്ടി അംഗത്വം സ്വീകരിച്ചു.
ബിജെപി നേതാവ് എ.എൻ. രാധാകൃഷ്ണൻ നടിയെ ഷാളണിയിച്ച് പാർട്ടിയിലേക്ക് സ്വാഗതം ചെയ്തു. പ്രമുഖ നിർമ്മാതാവ് ജി. സുരേഷ് കുമാറും ചടങ്ങിൽ സന്നിഹിതനായിരുന്നു.
പാർട്ടി പ്രവേശനത്തിന് ശേഷം മാധ്യമങ്ങളോട് സംസാരിച്ച ഊർമിള ഉണ്ണി, താനൊരു നരേന്ദ്ര മോദി ഫാനാണെന്ന് വെളിപ്പെടുത്തി. “മനസ്സ് കൊണ്ട് പണ്ടേ ബിജെപിയായിരുന്നു, എന്നാൽ സജീവ പ്രവർത്തകയായിരുന്നില്ല,” അവർ കൂട്ടിച്ചേർത്തു.
നൃത്തം, സിനിമ, സീരിയൽ മേഖലകളിൽ സജീവമായ ഊർമിള ഉണ്ണി, രാഷ്ട്രീയ പ്രവേശനത്തിലൂടെ സാമൂഹിക-സാംസ്‌കാരിക രംഗത്ത് കൂടുതൽ സജീവമാകാനാണ് ലക്ഷ്യമിടുന്നത്.
സംസ്ഥാനത്ത് തദ്ദേശ സ്വയംഭരണ തിരഞ്ഞെടുപ്പ് നടക്കാനിരിക്കുന്ന സാഹചര്യത്തിൽ ഊർമിള ഉണ്ണിയുടെ പാർട്ടി പ്രവേശനം ബിജെപിക്ക് കരുത്താകുമെന്നാണ് വിലയിരുത്തൽ.
