ഉത്തർപ്രദേശിലെ അലിഗഡ് മുസ്ലിം സർവകലാശാല (AMU) ക്യാംപസിനുള്ളിൽ ഞെട്ടിപ്പിക്കുന്ന കൊലപാതകം. രാവു ഡാനിഷ് അലി (43) എന്ന അധ്യാപകനെ ബൈക്കിലെത്തിയ രണ്ട് അജ്ഞാതർ വെടിവച്ചു കൊലപ്പെടുത്തി. ബുധനാഴ്ച രാത്രി ഏകദേശം 9 മണിയോടെ മൗലാനാ ആസാദ് ലൈബ്രറിക്ക് സമീപമുള്ള കാന്റീനിനടുത്താണ് സംഭവം. സഹപ്രവർത്തകരോടൊപ്പം നടക്കാനിറങ്ങിയ ഡാനിഷ് അലിക്ക് തലയ്ക്ക് മൂന്നോ അതിലധികമോ വെടിയേറ്റു. ജവഹർലാൽ നെഹ്റു മെഡിക്കൽ കോളേജിലെത്തിച്ചെങ്കിലും ചികിത്സയ്ക്കിടെ അദ്ദേഹം മരണപ്പെട്ടു. അധ്യാപകൻ ABK സ്കൂളിലെ കംപ്യൂട്ടർ സയൻസ് അധ്യാപകനായിരുന്നു.
പ്രതികൾ മുഖം മറച്ച നിലയിലാണ് ബൈക്കിൽ എത്തിയതെന്നും രണ്ടുപേരും ചേർന്ന് വെടിയുതിർത്തതായും പോലീസ് അറിയിച്ചു. സംഭവസ്ഥലത്തെ സിസിടിവി ദൃശ്യങ്ങൾ പരിശോധിച്ച് പ്രതികളെ തിരിച്ചറിയാനുള്ള ശ്രമം നടക്കുകയാണ്. കൊലപാതകത്തിന്റെ കാരണം ഇതുവരെ അറിയാനായിട്ടില്ല. സംഭവത്തെത്തുടർന്ന് ക്യാംപസിൽ കനത്ത സുരക്ഷ ഏർപ്പെടുത്തി. സർവകലാശാല പ്രോക്ടർ പ്രൊഫ. മുഹമ്മദ് വാസിം അലി സംഭവം സ്ഥിരീകരിച്ചു.
അധ്യാപകന്റെ മരണത്തിൽ ദുഃഖം രേഖപ്പെടുത്തി സർവകലാശാല അധികൃതരും പോലീസും അന്വേഷണം ഊർജിതമാക്കി. 2015 മുതൽ ABK ഹൈസ്കൂളിൽ സേവനമനുഷ്ഠിച്ചിരുന്ന ഡാനിഷ് അലി AMU-യിൽ തന്നെ വിദ്യാഭ്യാസം നേടിയയാളും യൂണിവേഴ്സിറ്റി ഹോഴ്സ് റൈഡിങ് ക്ലബിന്റെ മുൻ ക്യാപ്റ്റനുമായിരുന്നു. പ്രതികളെ പിടികൂടാൻ പോലീസ് വ്യാപക തിരച്ചിൽ നടത്തുകയാണ്
