ശബരിമല സ്വർണക്കൊള്ള ആരോപണവുമായി ബന്ധപ്പെട്ട് തദ്ദേശസ്വയംഭരണ തിരഞ്ഞെടുപ്പ് പ്രചാരണത്തിൽ യുഡിഎഫ് ഉപയോഗിച്ച ‘പോറ്റിയേ കേറ്റിയേ സ്വർണം ചെമ്പായി മാറ്റിയേ’ എന്ന പാരഡി ഗാനത്തിനെതിരെ തിരുവാഭരണപാത സംരക്ഷണ സമിതി ജനറൽ സെക്രട്ടറി പ്രശാന്ത് കുഴിക്കാല ഡിജിപി ഷെയ്ഖ് ദർവേഷ് സാഹിബിന് പരാതി നൽകി. പ്രസിദ്ധ അയ്യപ്പ ഭക്തിഗാനത്തെ വികലമാക്കി രാഷ്ട്രീയ ലാഭത്തിനായി ഉപയോഗിച്ചത് ഭക്തരുടെ വിശ്വാസത്തെ അവഹേളിക്കുന്നതാണെന്നാണ് പരാതിയിലെ പ്രധാന ആരോപണം.
ഗാനം തിരഞ്ഞെടുപ്പ് കാലത്ത് വ്യാപകമായി പ്രചരിച്ചിരുന്നു. യുഡിഎഫ് പ്രചാരണ വേദികളിലും പാർലമെന്റ് മന്ദിരത്തിന് മുന്നിലെ പ്രതിഷേധത്തിലും ഇത് ആലപിച്ചിരുന്നു. പരാതിയിൽ ശക്തമായ നിയമനടപടി ആവശ്യപ്പെട്ട് സിപിഎം പത്തനംതിട്ട ജില്ലാ സെക്രട്ടറി രാജു എബ്രഹാം രംഗത്തെത്തി. അയ്യപ്പഭക്തരുടെ വികാരങ്ങളെ വ്രണപ്പെടുത്തുന്നതാണ് ഗാനമെന്ന് അദ്ദേഹം ആരോപിച്ചു.
ഭക്തിഗാനങ്ങളെ രാഷ്ട്രീയ പ്രചാരണായുധമാക്കുന്നത് അംഗീകരിക്കാനാവില്ലെന്നും പരാതിക്കാർ ചൂണ്ടിക്കാട്ടി. സംഭവം വിവാദമായതോടെ ഗാനത്തിന്റെ പ്രചാരണം നിയന്ത്രിക്കണമെന്ന ആവശ്യവും ഉയരുന്നുണ്ട്. പരാതിയിൽ അന്വേഷണം ആരംഭിച്ചിട്ടുണ്ടോ എന്നത് വ്യക്തമല്ല.
