തിരുവനന്തപുരം: കേരള സർവകലാശാല രജിസ്ട്രാർ ഡോ. കെ.എസ്. അനിൽകുമാറിനെ സ്ഥാനത്തുനിന്ന് മാറ്റി സർക്കാർ ഉത്തരവിട്ടു. ഡെപ്യൂട്ടേഷൻ അവസാനിപ്പിച്ച് ശാസ്താംകോട്ട ഡിബി കോളേജിലേക്ക് പ്രിൻസിപ്പലായി തിരിച്ചുനിയമിച്ചാണ് നടപടി. അനിൽകുമാറിന്റെ തന്നെ അഭ്യർത്ഥന പ്രകാരമാണ് മാറ്റമെന്നാണ് വിവരം. ഹൈക്കോടതിയിൽ നാളെ പരിഗണനയ്ക്ക് വരാനിരിക്കെ സസ്പെൻഷൻ റദ്ദാക്കി തിരിച്ചെടുക്കണമെന്നാവശ്യപ്പെട്ട ഹർജിയുടെ പശ്ചാത്തലത്തിലാണ് പുതിയ ഉത്തരവ്.
ഭാരതാംബ ചിത്ര വിവാദത്തിലാണ് അനിൽകുമാർ നേരത്തെ സസ്പെൻഡ് ചെയ്യപ്പെട്ടത്. ഗവർണർ പങ്കെടുത്ത പരിപാടിയിൽ കാവി കൊടിയേന്തിയ ഭാരതാംബ ചിത്രം ഉപയോഗിച്ചത് സർവകലാശാല നിബന്ധനകൾക്ക് വിരുദ്ധമെന്ന് ചൂണ്ടിക്കാട്ടി രജിസ്ട്രാർ അനുമതി നിഷേധിച്ചിരുന്നു. എന്നാൽ പരിപാടി നടന്നതോടെ വിവാദമായി. ഗവർണറോട് അനാദരവ് കാട്ടിയെന്ന ആരോപണത്തിൽ വിസി മോഹനൻ കുന്നുമ്മൽ സസ്പെൻഡ് ചെയ്തു. സിൻഡിക്കേറ്റ് സസ്പെൻഷൻ റദ്ദാക്കിയെങ്കിലും വിസി അംഗീകരിക്കാതെ ഭരണതർക്കമുണ്ടായി.
എസ്എഫ്ഐയടക്കമുള്ള ഇടത് സംഘടനകൾ വിസിക്കെതിരെ പ്രതിഷേധിച്ചു. സർക്കാരിന്റെ പിന്തുണ അനിൽകുമാറിനൊപ്പമായിരുന്നെങ്കിലും വിഷയം കോടതിയിലേക്ക് നീണ്ടു. സർവകലാശാലകളിലെ വിസി നിയമനങ്ങളിൽ ഗവർണറുമായി സമവായമുണ്ടായ പശ്ചാത്തലത്തിലാണ് ഇപ്പോഴത്തെ മാറ്റം. സാങ്കേതിക, ഡിജിറ്റൽ സർവകലാശാലകളിലെ നിയമന തർക്കത്തിൽ സർക്കാർ വഴങ്ങിയതിന് സമാനമായി ഈ നീക്കം കാണാം.
വിവാദം പരിഹാരമില്ലാതെ നീണ്ടുനിന്നതോടെ അനിൽകുമാർ തിരിച്ചുപോക്ക് ആവശ്യപ്പെട്ടതായി സൂചനയുണ്ട്. പുതിയ ഉത്തരവ് സർവകലാശാലയിലെ തർക്കങ്ങൾക്ക് താത്കാലിക പരിഹാരമാകുമെന്ന പ്രതീക്ഷയിലാണ് അധികൃതർ.
