കൊല്ലം∙ കൊട്ടിയം മൈലക്കാട് ഭാഗത്ത് ദേശീയപാതയുടെ നിർമാണം നടക്കുന്നിടത്ത് സംരക്ഷണഭിത്തി പൂർണമായി തകർന്ന് റോഡ് അപകടകരമായ രീതിയിൽ ഇടിഞ്ഞുതാഴ്ന്നു. മൈലക്കാട് പാലത്തിന്റെ അപ്രോച്ച് റോഡിനോട് ചേർന്നുള്ള സർവീസ് റോഡ് ഉൾപ്പെടെ വൻ ഗർത്തമായി മാറി. കനത്ത മഴയെ തുടർന്ന് മണ്ണിടിഞ്ഞതാണ് അപകടത്തിന് കാരണമെന്നാണ് പ്രാഥമിക നിഗമനം.
സ്കൂൾ ബസ്, കാറുകൾ ഉൾപ്പെടെ നിരവധി വാഹനങ്ങൾ ഗർത്തത്തിൽ കുടുങ്ങി. ചില വാഹനങ്ങൾ ചെരിഞ്ഞുനിന്ന നിലയിലായി. യാത്രക്കാർക്ക് പരിക്കില്ലെങ്കിലും വൻ ഗതാഗതക്കുരുക്കാണ് ഉണ്ടായത്. ദേശീയപാത അതോറിറ്റിയും പൊലീസും സ്ഥലത്തെത്തി ഗതാഗതം തിരിച്ചുവിട്ടു.
സംഭവത്തിൽ അടിയന്തര അന്വേഷണത്തിന് പൊതുമരാമത്ത് വകുപ്പ് മന്ത്രി പി.എ മുഹമ്മദ് റിയാസ് നിർദേശം നൽകി. നിർമാണത്തിലെ ഗുണനിലവാരക്കുറവോ ഡിസൈൻ പിഴവോ ഉണ്ടോയെന്ന് പരിശോധിക്കുമെന്ന് മന്ത്രി അറിയിച്ചു. തകർന്ന ഭാഗം അടിയന്തരമായി നന്നാക്കി ഗതാഗതം പുനഃസ്ഥാപിക്കാനുള്ള നടപടി ആരംഭിച്ചു.
