കൊച്ചി: എറണാകുളം നോർത്ത് പോലീസ് സ്റ്റേഷനിൽ വെച്ച് ഗർഭിണിയായ യുവതിയെ ക്രൂരമായി മർദ്ദിച്ച സംഭവത്തിൽ എസ്എച്ച്ഒ പ്രതാപചന്ദ്രനെ സർവീസിൽ നിന്ന് സസ്പെൻഡ് ചെയ്തു. നിലവിൽ അരൂർ പോലീസ് സ്റ്റേഷൻ എസ്എച്ച്ഒ ആയ ഇയാളെ അന്വേഷണ വിധേയമായാണ് സസ്പെൻഡ് ചെയ്തതെന്ന് ദക്ഷിണ മേഖല ഡിഐജി അറിയിച്ചു. സ്റ്റേഷനുള്ളിൽ വെച്ച് യുവതിയെ മർദ്ദിക്കുന്ന സിസിടിവി ദൃശ്യങ്ങൾ പുറത്തുവന്നതിന് പിന്നാലെ മുഖ്യമന്ത്രി കർശന നടപടിക്ക് നിർദ്ദേശം നൽകിയിരുന്നു.
സംഭവം നടന്നത് 2024 ജൂണിൽ
2024 ജൂണിൽ എറണാകുളം നോർത്ത് പോലീസ് സ്റ്റേഷനിൽ വെച്ചാണ് കേസിനാസ്പദമായ സംഭവം നടന്നത്. അകാരണമായി പോലീസ് കസ്റ്റഡിയിലെടുത്ത ഭർത്താവിനെക്കുറിച്ച് അന്വേഷിക്കാനെത്തിയ ഷൈമോൾ എൻ.ജെ എന്ന യുവതിയെയാണ് സിഐ പ്രതാപചന്ദ്രൻ മർദ്ദിച്ചത്. ഷൈമോളിന്റെ മുഖത്തടിക്കുകയും നെഞ്ചിൽ പിടിച്ച് തള്ളുകയും ചെയ്യുന്നത് പുറത്തുവന്ന ദൃശ്യങ്ങളിൽ വ്യക്തമാണ്. ഒരു വർഷത്തോളം നീണ്ട നിയമപോരാട്ടത്തിനൊടുവിൽ കോടതി ഉത്തരവിലൂടെയാണ് ഷൈമോളിന് ഈ നിർണ്ണായക തെളിവുകൾ ലഭിച്ചത്.
സംഭവം വിവാദമായതോടെ ഡിജിപിക്ക് മുഖ്യമന്ത്രി കർശന നിർദ്ദേശം നൽകുകയും അന്വേഷണ പുരോഗതി കൃത്യമായി അറിയിക്കാൻ ആവശ്യപ്പെടുകയും ചെയ്തു. ഇതിനെത്തുടർന്നാണ് ഉടനടിയുള്ള അച്ചടക്ക നടപടി ഉണ്ടായത്. പോലീസ് അതിക്രമത്തിനെതിരെ വലിയ ജനരോഷം ഉയർന്ന പശ്ചാത്തലത്തിൽ, വരും ദിവസങ്ങളിൽ ഇയാൾക്കെതിരെ ക്രിമിനൽ കേസെടുക്കുന്നതടക്കമുള്ള കൂടുതൽ നടപടികൾ ഉണ്ടായേക്കുമെന്നാണ് സൂചന.
