രണ്ടും കൽപ്പിച്ചോ അമേരിക്ക, വീണ്ടും കടുത്ത പ്രകോപനം, വെനസ്വേലയുടെ രണ്ടാം എണ്ണക്കപ്പൽ പിടിച്ചെടുത്തു

വാഷിങ്ടൺ: വെനസ്വേലയിൽനിന്ന് ക്രൂഡ് ഓയിൽ കയറ്റി പുറപ്പെട്ട പനാമ രജിസ്റ്റേഡ് ‘സെഞ്ച്വറീസ്’ എന്ന എണ്ണക്കപ്പൽ അന്താരാഷ്ട്ര ജലാതിർത്തിയിൽ വെച്ച് യുഎസ് കോസ്റ്റ് ഗാർഡ് പിടിച്ചെടുത്തു. പ്രസിഡന്റ് ഡോണൾഡ് ട്രംപിന്റെ നിർദേശപ്രകാരമുള്ള വെനസ്വേലൻ എണ്ണക്കപ്പലുകളുടെ ‘പൂർണ ബ്ലോക്കേഡ്’ നടപ്പാക്കുന്നതിന്റെ ഭാഗമായാണ് നടപടി. ഒരു മാസത്തിനിടെ രണ്ടാമത്തെ സമാന ഇടപെടലാണിത്. ഡിസംബർ 10-ന് ഇറാൻ ബന്ധമുള്ള സ്കിപ്പർ എന്ന കപ്പൽ പിടിച്ചെടുത്തിരുന്നു.

യുഎസ് ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോം സമൂഹമാധ്യമങ്ങളിൽ പങ്കുവെച്ച വീഡിയോയിൽ ഹെലികോപ്റ്ററുകളിൽനിന്ന് പ്രത്യേക സംഘം കപ്പലിന്റെ ഡെക്കിലിറങ്ങി നിയന്ത്രണമേറ്റെടുക്കുന്ന ദൃശ്യങ്ങൾ കാണാം. കപ്പൽ ഏഷ്യൻ രാജ്യത്തേക്ക് (ചൈനയിലേക്ക്) പോകുന്നതായിരുന്നുവെന്നാണ് റിപ്പോർട്ടുകൾ. എന്നാൽ ഇത്തവണ പിടിച്ചെടുത്ത കപ്പൽ യുഎസ് സാങ്ക്ഷൻ ലിസ്റ്റിലില്ലാത്തതാണ്, ഇത് നടപടിയുടെ തീവ്രത വർധിപ്പിക്കുന്നു.

വെനസ്വേലൻ പ്രസിഡന്റ് നിക്കോളാസ് മഡുറോയുടെ സർക്കാർ എണ്ണവരുമാനം മയക്കുമരുന്ന് കടത്തിനും ഭീകരപ്രവർത്തനങ്ങൾക്കും ഉപയോഗിക്കുന്നുവെന്നാണ് യുഎസ് ആരോപണം. നടപടിയെ ‘മോഷണവും കടൽക്കൊള്ളയും’ എന്ന് വിശേഷിപ്പിച്ച വെനസ്വേല ഐക്യരാഷ്ട്രസഭാ സുരക്ഷാ കൗൺസിലിൽ പരാതി നൽകുമെന്നറിയിച്ചു. കരീബിയൻ കടലിൽ യുഎസ് സൈനിക സാന്നിധ്യം വർധിപ്പിച്ച പശ്ചാത്തലത്തിലാണ് സംഭവം.

ഈ നടപടികൾ വെനസ്വേലൻ ക്രൂഡ് ഓയിൽ കയറ്റുമതി ഗണ്യമായി കുറച്ചു. ഷാഡോ ഫ്ലീറ്റ് എന്നറിയപ്പെടുന്ന രഹസ്യ കപ്പലുകളാണ് പലപ്പോഴും വെനസ്വേലൻ എണ്ണ കടത്തുന്നത്. യുഎസിന്റെ തീവ്ര നടപടികൾ രാജ്യാന്തര നിയമലംഘനമാണെന്ന വിമർശനങ്ങളും ഉയരുന്നുണ്ട്.