അബുദാബി: അബുദാബിയിൽ മലയാളികൾ സഞ്ചരിച്ച വാഹനം അപകടത്തിൽപ്പെട്ട സംഭവത്തിൽ മരണസംഖ്യ അഞ്ചായി ഉയർന്നു. ചികിത്സയിലായിരുന്ന ഒരു കുട്ടി കൂടി മരണപ്പെട്ടതോടെയാണ് ഒരു കുടുംബത്തിന്റെ നോവ് ഇരട്ടിയായത്. ദുബായിൽ വ്യാപാരിയായ കോഴിക്കോട് സ്വദേശി അബ്ദുൽ ലത്തീഫിന്റെ കുടുംബം സഞ്ചരിച്ചിരുന്ന വാഹനമാണ് അപകടത്തിൽപ്പെട്ടത്.
നേരത്തെ അപകടസ്ഥലത്ത് വെച്ച് തന്നെ ലത്തീഫിന്റെ മൂന്ന് മക്കളും വീട്ടുജോലിക്കാരിയും മരണപ്പെട്ടിരുന്നു. പരിക്കേറ്റ് തീവ്രപരിചരണ വിഭാഗത്തിൽ ചികിത്സയിലായിരുന്ന ലത്തീഫിന്റെ നാലാമത്തെ കുട്ടി കൂടി മരണപ്പെട്ടതോടെ ആ കുടുംബത്തിലെ അഞ്ച് പേരെയാണ് ഈ ദുരന്തം കവർന്നത്. അബ്ദുൽ ലത്തീഫ്, ഭാര്യ, അദ്ദേഹത്തിന്റെ മാതാവ് എന്നിവർ ഇപ്പോഴും ആശുപത്രിയിൽ ചികിത്സയിൽ തുടരുകയാണ്.
അബുദാബിയിൽ നിന്ന് സന്ദർശനം കഴിഞ്ഞ് മടങ്ങുന്നതിനിടെ ഇവർ സഞ്ചരിച്ചിരുന്ന നിസാൻ പട്രോൾ കാർ നിയന്ത്രണം വിട്ട് അപകടത്തിൽപ്പെടുകയായിരുന്നു. ഒരു കുടുംബത്തിലെ പിഞ്ചുകുഞ്ഞുങ്ങൾ ഉൾപ്പെടെയുള്ളവരുടെ വിയോഗം പ്രവാസി മലയാളി സമൂഹത്തെ ഒന്നടങ്കം ദുഃഖത്തിലാഴ്ത്തിയിരിക്കുകയാണ്. മൃതദേഹങ്ങൾ നാട്ടിലെത്തിക്കാനുള്ള നടപടികൾ പുരോഗമിക്കുന്നു.
